Almatyda Ermensaı shaǵynaýdany men Bostandyq aýdanyndaǵy turǵyn úı keshenderin úzdiksiz taza sýmen qamtamasyz etetin sý qubyry salynyp jatyr, - dep habarlaıdy aqshamnews.kz.
Bostandyq aýdanyna qarasty Ermensaı shaǵynaýdanynda aýyzsý tapshylyǵy máselesin sheshý maqsatynda reversıvti sý qubyrynyń qurylysy qarqyndy júrip jatyr. Joba júzege assa, Ermensaı men irgeles iri turǵyn úı keshenderiniń turǵyndary táýlik boıy úzdiksiz sýmen qamtylady. Bul jóninde qalalyq Energetıka jáne sýmen jabdyqtaý basqarmasy málimdedi.
Jobany «SGGroup Sapa Stroı» JSHS Almaty qalasynyń Energetıka jáne sýmen jabdyqtaý basqarmasymen birlesip, tehnogendik sıpattaǵy tótenshe jaǵdaıdyń aldyn alý jáne apattyq-qalpyna keltirý jumystary aıasynda júzege asyryp otyr.
Qurylys jumystary eki negizgi baǵytqa bólingen. Birinshi baǵyt – ál-Farabı dańǵylynan «Sakura», «Silver Hills» jáne «Verona» TÚK-ne deıingi aralyqta sorǵy stansıasy salynyp, sý qubyry men elektr jelileri tartylady, jol tósemesiniń negizi daıyndalady. Bul jumysty 2025 jyldyń 1 qyrkúıegine deıin aıaqtaý josparlanyp otyr.
Ekinshi baǵyt – «Sakura» turǵyn úı kesheninen «Nurlytaý» sý daıyndaý stansıasyna deıingi aralyqta da osyǵan uqsas qurylys jumystary 2025 jyly 25 jeltoqsanyna deıin jalǵasady. Al joldyń ústińgi qabatyn asfálttaý jáne kóriktendirý jumystary 2026 jyly naýryz-sáýir aılaryna josparlanǵan.
Sonymen qatar ál-Farabı dańǵylynyń ońtústik jaǵynda jańadan sý burý júıesin ornatý kózdelgen, ol boıynsha qosý jumystary bıylǵy jyldyń tórtinshi toqsanynda júrgiziledi.
Qazirgi ýaqytta ınjenerlik-geologıalyq jáne topografıalyq zertteý jumystary aıaqtalyp, jobalyq-smetalyq qujattama ázirlenýde, sorǵy stansıalary salynatyn oryndar naqtylandy. Búginge deıin 3,3 shaqyrymnan astam sý qubyry tartylyp, turǵyn úılerdi ýaqytsha sýmen qamtý úshin sorǵy stansıasy men qubyr jelisi ornatylyp jatyr.
«Bul joba – Bostandyq aýdany turǵyndarynyń tirshiligi úshin asa mańyzdy. Bas merdiger qurylys jumystaryn jedeldetilgen keste boıynsha júrgizip, yqtımal qaýip-qaterlerdi azaıtyp, halyqty úzdiksiz taza sýmen qamtamasyz etýge bar kúshin salyp otyr», – dedi jobanyń dırektory Sergeı Kovalev.