Shaǵyn jáne orta bıznes (SHOB) megapolıstiń ekonomıkalyq júıesindegi negizgi býyn, ol qalanyń turaqty damýy men básekege qabilettiligin qamtamasyz etedi. Bul týraly OKQ alańynda ótken brıfıń barysynda Almaty qalasynyń ákimi Darhan Satybaldy málimdedi.
2026 jyly jergilikti búdjetten SHOB-ty qoldaýǵa 66 mlrd teńge qarastyrylǵan, bul bıylǵy kórsetkishten 30%-ǵa artyq. Ákimniń bastamasymen jáne máslıhat depýtattarynyń qoldaýymen arnaýly salyq rejımi boıynsha mólsherleme 4%-dan 3%-ǵa deıin tómendetildi. Óndiristik áleýetti arttyrý maqsatynda 2027 jyldyń sońyna deıin jalpy aýdany 226 myń sharshy metrden asatyn 39 shaǵyn ónerkásip parkin iske qosý josparlanyp otyr. Sonyń nátıjesinde 4,8 myń jańa jumys orny ashylady. Negizgi maqsat – 2030 jylǵa qaraı SHOB-tyń qala ekonomıkasyndaǵy úlesin qazirgi 60%-dan 65%-ǵa deıin arttyrý.
"Memleket basshysy óńdeý ónerkásibin damytýǵa basymdyq bere otyryp, jańa ınvestısıalyq kezeńdi iske qosýdy tapsyrdy. Búginde ınvestorlardyń Indýstrıalyq aımaq pen "Inovasıalyq tehnologıalar parki" arnaıy ekonomıkalyq aımaǵynda ("ITP" AEA) ornalasýǵa degen suranys qazirgi usynystan asyp otyr. Osyǵan baılanysty Indýstrıalyq aımaqtyń aýmaǵyn 634 gektarǵa keńeıtý, "ITP" AEA aýmaǵyn ulǵaıtý jáne jeńildikter merzimin 2050 jylǵa deıin uzartý josparlanǵan. 2026-2028 jyldar aralyǵynda jalpy quny 2,3 trln teńge bolatyn 165 ınvestısıalyq jobany júzege asyrý kózdelgen. Bul qala ekonomıkasynyń áleýmettik-ekonomıkalyq damýyna qýatty serpin beredi. 2030 jylǵa qaraı óńdeý ónerkásibi ónimderiniń eksporty 40%-ǵa ósip, 7 mlrd AQSH dollaryna jetedi", – dedi Almaty ákimi.