OKQ alańynda ótken brıfıńte Almaty qalasynyń ákimi Darhan Satybaldy merdiger uıymdarǵa avanstyq tólem berýdi toqtatý týraly sheshim qabyldanǵanyn málimdedi. Budan bylaı kelisimshart boıynsha tólem tek naqty oryndalǵan jumystyń nátıjesi boıynsha beriledi.
Jumys sapary men kúrdeli nysandardy tekserý barysynda birqatar kompanıanyń konkýrsta jeńiske jetip, avans alyp, ózine júktelgen jumystyń barlyǵyn qosalqy merdiger uıymdarǵa tolyqtaı berip otyrǵany anyqtalǵan. Bul rette olar jobalardy júzege asyrýǵa is júzinde qatyspaıdy.
"Jumysqa kirisken alǵashqy kúnnen bastap kóptegen kompanıanyń konkýrsqa qatysyp, avans alyp, keıin jumysty 100% qosalqy merdigerlerge tapsyratynyn kórdim. Ózderi basqa óńirlerde bolyp, nysanǵa is júzinde kelmeıdi", – dedi Darhan Satybaldy.
Ákim qazirgi ýaqytta konkýrstardyń jeńimpazy Qarjy mınıstrliginiń portalynda qoldanylatyn reıtıńtik-baldyq júıe arqyly aıqyndalatynyn eske saldy. Bul júıede jeńimpaz avtomatty túrde anyqtalady, onda adamı faktor joq.
"Kompanıalar konkýrstarda 30 paıyzdyq avans qarastyrylǵanyn kórip, shyn máninde tek sol qarajat úshin ǵana qatysady. Sonyń kesirinen jobalardy júzege asyrý merzimi sozylyp ketedi, al tapsyrys berýshi kompanıa quryltaıshylaryn basqa qalalardan izdeýge májbúr bolady", – dedi megapolıs basshysy.
Osyǵan baılanysty Almaty qalasynyń ákimdigi avanstyq tólemnen bas tartý týraly sheshim qabyldady. "Mundaı jaǵdaı endi qaıtalanbaýy úshin biz naqty sheshim qabyldadyq: aldymen jumys oryndalady, sodan keıin ǵana tólem jasalady. Avanssyz", – dedi Almaty ákimi.
Jańa tájirıbe merdiger uıymdardyń jaýapkershiligin arttyrýǵa, olardyń jobalarǵa naqty qatysýyn qamtamasyz etýge, sondaı-aq qaladaǵy qurylys jáne ınfraqurylymdyq jumystardy ýaqytyly oryndaýǵa múmkindik bermek.