Bul týraly Ortalyq komýnıkasıalar qyzmetiniń alańynda ótken brıfıń barysynda Almaty qalasynyń ákimi Darhan Satybaldy málimdedi. Onyń aıtýynsha, polıortalyqty damýmen birge Almaty jasyl ári ornyqty megapolıske aınalady.
Bul jumysqa London, Máskeý, Shanhaıdyń jáne elimizdiń úzdik sarapshylary men ýrbanısteri tartylyp otyr. Kóriktendirý standarttaryn tıimdi iske asyrý maqsatynda qalalyq Ýrbanıstıka ortalyǵy quryldy.
"2026-2027 jyldary 38 qoǵamdyq keńistikti qurý jáne jańǵyrtý josparlanǵan. Olardyń qatarynda Tuńǵysh Prezıdent saıabaǵy, Áýejaı kóli jaǵalaýy, Esentaı, Úlken Almaty ózenderi jáne basqa da mańyzdy demalys aımaqtary bar. "Qasbetten qasbetke deıin" qaǵıdaty boıynsha 68 kóshe jańǵyrtylady. Onyń aıasynda ǵımarattar jańaryp, zamanaýı shamdar ornatylady, trotýarlar tóselip, aýmaqtar kóriktendiriledi", – dedi Darhan Satybaldy.
Ákimniń aıtýynsha, qala tazalyǵyn qamtamasyz etý úshin "Almaty Tazalyq" komýnaldyq kásipornynyń jumysy kúsheıtildi. Atap aıtqanda, qyzmetkerler sany 600 adamnan 2 000 adamǵa deıin ulǵaıdy, eńbekaqy mólsheri 170 myń teńgeden 370 myń teńgege deıin artty, sondaı-aq 330 birlik jańa arnaıy tehnıka satyp alyndy.
Sondaı-aq, "Jasyl Almaty" biryńǵaı operatory quryldy. Onyń qaramaǵyna 400 gektardan astam jasyl aýmaq kezeń-kezeńimen berilip jatyr. Buǵan qosa, "Taza Qazaqstan" respýblıkalyq aksıasy aıasynda jyl basynan berip Almatyda 9,4 myń gektardan astam aýmaq tazartylyp, 58 myń kýb metrden astam qoqys shyǵaryldy. Bul jumys 2026 jyly da jalǵasady.