Almaty úshin ekologıalyq kún tártibi basym baǵyt sanalady jáne ol turǵyndardyń turmys sapasyn arttyrý men ornyqty megapolıs qalyptastyrýdyń negizgi sharty retinde qarastyrylady. Bul týraly Ortalyq komýnıkasıalar qyzmetiniń alańynda ótken brıfıń barysynda Almaty qalasynyń ákimi Darhan Satybaldy málimdedi.
Ákimniń aıtýynsha, 2026 jyldyń sońyna deıin 2-JEO-ni tabıǵı gazǵa kóshirý jumystary aıaqtalady. Kelesi kezeńde bý-gaz tehnologıasyn engize otyryp, 3-JEO-ti qaıta jańǵyrtý josparlanǵan. Bul jylý kózderinen shyǵatyn zıandy zattar kólemin 92%-ǵa deıin azaıtýǵa múmkindik beredi.
2027 jylǵa qaraı jeke turǵyn úıler 100% tabıǵı gazben qamtylady. Al 2028 jylǵa qaraı qalalyq baǵyttarda ekologıalyq taza qoǵamdyq kólikke tolyq kóshý josparlanǵan. Bul aýa sapasyn jaqsartyp, qalanyń turaqty damýyna jol ashatyn mańyzdy qadam bolmaq.
"Biz qaldyqtardy basqarý júıesin jetildirip, polıgondarda kómý tájirıbesinen tereń óńdeý men energıa óndirý arqyly kádege jaratýǵa kóshemiz. Almatyda qaldyqtardy basqarý salasy kómý tásilinen tereń óńdeý jáne energetıkalyq kádege jaratýǵa kezeń-kezeńimen aýysyp jatyr. Jylyna 80 myń tonnaǵa deıin plasık óńdeıtin jáne jylyna 150 myń tonna makýlatýrany óńdeıtin zaýyttar salý josparlanǵan. Qaıta óńdeýge jaramsyz qaldyqtar energıa óndirý úshin jaǵylady. Ol úshin táýligine 2 myń tonna qaldyqty órteıtin qoqys jaǵý zaýytyn salý kózdelip otyr. Atalǵan sharalardy iske asyrý 2030 jylǵa qaraı komýnaldyq qaldyqtardy óńdeý jáne kádege jaratý úlesin 37% paıyzǵa deıin arttyrýǵa múmkindik beredi", – dep málimdedi Darhan Satybaldy.