Ortalyq komýnıkasıalar qyzmetiniń alańynda ótken brıfıń barysynda Almaty qalasynyń ákimi Darhan Satybaldy 2025 jyly qańtar-qarasha aılaryndaǵy megapolıstiń áleýmettik-ekonomıkalyq damýynyń negizgi kórsetkishterin tanystyrdy. Ákimniń aıtýynsha, qalanyń basty basymdyǵy - uzaq merzimdi damýdyń negizi sanalatyn ekonomıkanyń turaqty ósimin qamtamasyz etý.
"Bıyl Almatyda iskerlik belsendilik joǵary deńgeıde saqtalyp, ınvestısıalyq serpin oń baǵytta damydy. 11 aıdyń qorytyndysy boıynsha qysqa merzimdi ekonomıkalyq ındıkator 11,4% bolyp, ótken jyldyń osy kezeńindegi kórsetkishten asyp tústi. Ekonomıkalyq ósimniń negizgi draıverleri - qurylys (38,3%), kólik salasy (21,5%) jáne óńdeý ónerkásibi (16,8%)", - dedi Almaty ákimi.
Darhan Satybaldy atap ótkendeı, ekonomıkalyq ósim joǵary ınvestısıalyq belsendilikpen nyǵaıa túsýde. 2025 jyldyń qańtar-qarasha aılarynda qalanyń negizgi kapıtalyna 1,9 trln teńge ınvestısıa tartyldy. Bul ótken jyldyń osy kezeńimen salystyrǵanda 19%-ǵa kóp.
Jyl ishinde jalpy quny shamamen 500 mlrd teńge bolatyn 12 iri ınvestısıalyq joba iske qosyldy. Olardyń qatarynda Haval, Chery jáne Changan markaly jeńil avtokólikter shyǵaratyn mýltıbrendti zaýyt, avtokólik shınalaryn rezeńke úgindisine qaıta óńdeý zaýyty, shyny ydys óndiretin kásiporyn, sondaı-aq kún modýlderin shyǵarý jobalary bar.
Jyl qorytyndysy boıynsha Almaty qalasynyń jalpy óńirlik óniminiń ósimi 6,4% deńgeıinde bolmaq. Ekonomıkanyń damýy salyq túsimderiniń turaqty artýymen qatar júrýde: 2025 jyly 11 aıda jergilikti búdjetke 1 trln 970 mlrd teńge tústi. Bul kórsetkish ótken jyldyń osy kezeńimen salystyrǵanda 19,4%-ǵa joǵary.
"Qala turǵyndarynyń ál-aýqatyn arttyrý máselesine aıryqsha kóńil bólinip otyr. 2025 jyly Almatyda 92 myń jumys orny quryldy, onyń 87%-y – turaqty. Toǵyz aıdyń qorytyndysy boıynsha qaladaǵy ortasha aılyq jalaqy 539 myń teńge bolyp, nomınaldy mánde 14,5%-ǵa ósti jáne respýblıkalyq ortasha deńgeıden 29%-ǵa joǵary boldy", – dedi Almaty ákimi Darhan Satybaldy.