MÁMS júıesindegi ózgeristerdi túsindirýge baǵyttalǵan júıeli jumys aıasynda oqytý sharalarynyń biri №36 qalalyq emhanada ótti. İs-shara barysynda MÁMS júıesindegi ózgeristerdiń tájirıbelik aspektilerine, sondaı-aq medısına qyzmetkerleriniń pasıenttermen ózara is-qımylyna erekshe nazar aýdaryldy.
Oqytýdy emhana dırektory Gúljaınat Tilegen ótkizdi. Negizgi basymdyq medısınalyq kómekti qarjylandyrýdyń jańa qaǵıdalaryn túsindirýge jáne medısına qyzmetkerleriniń pasıentterdi aqparattandyrýdaǵy róline berildi.
Osyndaı túsindirý kezdesýleri qalanyń barlyq medısınalyq uıymynda uıymdastyrylyp jatyr.
Atalǵan sharanyń maqsaty - MÁMS júıesindegi ózgeristi biryńǵaı túsinýdi qamtamasyz etý jáne medısına qyzmetkerleriniń jańa jaǵdaıda pasıenttermen jumys isteýge daıyndyǵyn arttyrý. Bul árbir qala turǵynynyń qajetti medısınalyq kómekti ýaqtyly ári tolyq kólemde alýyna múmkindik beredi.
2026 jylǵy qańtardyń 1-inen bastap MÁMS júıesinde mańyzdy ózgerister engiziledi: sozylmaly aýrýdyń bir bóligi saqtandyrý paketine aýystyrylady. Bul sheshim halyqtyń emdelýge qoljetimdigin keńeıtýge baǵyttalǵan.
MÁMS paketine áleýmettik mańyzy bar aýrý - qant dıabeti, balalardyń serebraldy sal aýrýy, dáneker tinniń júıeli zaqymdanýy jáne revmatızm engiziledi. Bul pasıent úshin saqtandyrylǵan mártebesi bolǵan jaǵdaıda medısınalyq kómekti, konsýltasıany jáne dárilik qamtamasyz etýdi tegin alý saqtalatynyn bildiredi.
Sonymen qatar tegin medısınalyq kómektiń kepildendirilgen kólemi (TMKKK) sheńberinde uzaq ári qymbat emdeýdi qajet etetin eń aýyr 11 aýrý qalady. Olardyń qatarynda týberkýlez, AITV-ınfeksıasy, qaterli isik aýrýy, sozylmaly vırýstyq gepatıtter men baýyr sırrozy, psıhıkalyq jáne minez-qulyqtyq buzylys, orfandyq aýrý, ortalyq júıke júıesiniń degeneratıvti jáne demıelınızasıalyq aýrýy, epılepsıa, sondaı-aq jedel jaǵdaı - mıokard ınfarkti (alǵashqy alty aı) jáne ınsýlt (bir jyl ishinde) bar. Bul aýrý burynǵydaı pasıenttiń saqtandyrylý mártebesine qaramastan tolyq kólemde memleket esebinen qarjylandyrylady.
2026 jylǵy qańtardan bastap medısınalyq kómektiń Biryńǵaı paketine kezeń-kezeńimen kóshý bastalady. Ol:
- TMKKK men MÁMS arasyndaǵy naqty shekarany aıqyndaýdy jáne qyzmetterdiń qaıtalanýyn boldyrmaýdy;
- aýrýdyń erte aldyn alýǵa qoljetimdikti;
- MÁMS-tegi mártebesine qaramastan barlyq azamat úshin onkologıalyq aýrýdy anyqtaýǵa arnalǵan skrınıngten ótýdi;
- áleýmettik mańyzy bar aýrýǵa kúdik týyndaǵan jaǵdaıda tegin tekserýdi;
- resýrsty qaıta bólý arqyly júıeniń qarjylyq turaqtylyǵyn qamtamasyz etýdi kózdeıdi.
Oqytý barysynda áleýmettik qorǵaý máselesine de erekshe nazar aýdaryldy. On bes jeńildikti sanatqa jatatyn azamat, sonyń ishinde balalar, múgedektigi bar adamdar, zeınetkerler, jumyssyzdar jáne ózge de sanat ókilderi barlyq qajetti medısınalyq kómekti tegin ala beredi.
2026 jylǵy qańtardyń 1-inen bastap ómirlik qıyn jaǵdaıǵa tap bolǵan azamattarǵa qosymsha qoldaý kórsetiledi. Áleýmettik ál-aýqatynyń daǵdarystyq nemese shuǵyl deńgeıine jatatyn D jáne E sanatyndaǵy, tabysy nemese zeınetaqy jarnasy joq adamdar úshin MÁMS júıesindegi jarna jergilikti atqarýshy organdardyń qarajaty esebinen tólenedi. Bul olardyń jumys istemegen jáne jarna aýdarmaǵan jaǵdaıdyń ózinde medısınalyq kómekke qoljetimdigi saqtalatynyn bildiredi.