OKQ alańynda ótken brıfıń barysynda Almaty qalasynyń ákimi Darhan Satybaldy turǵyndardyń turmys sapasyn arttyrýǵa jáne jastardy qoldaýǵa baǵyttalǵan áleýmettik ınfraqurylymdy damytý jóninde qabyldanyp jatqan sharalar týraly málimdedi.
Ákimniń aıtýynsha, bilim berý ınfraqurylymyn damytýǵa erekshe kóńil bólingen. 2025 jyly qalada 37,1 myń orynǵa arnalǵan 22 bilim berý nysany salyndy. Bul jobalardy iske asyrý kelesi oqý jylynyń basyna qaraı oqýshy oryndarynyń tapshylyǵyn 29,7 myńnan 3-4 myńǵa deıin qysqartýǵa múmkindik beredi.
Sondaı-aq Almaty ákimi densaýlyq saqtaý salasynyń damýyna da toqtaldy. 2025 jyly bul salany qarjylandyrý 25%-ǵa artyp, 48,8 mlrd teńgege jetti. Jyl ishinde Almatyda medısınalyq-sanıtarlyq alǵashqy kómek kórsetetin 2 ortalyq jáne 1 emhana salyndy. Budan bólek, aýrýhanalar, perzenthanalar, emhanalar men SPID ortalyqtaryn qosqanda, taǵy 32 nysandy salý jáne jańǵyrtý jobalary pysyqtalyp jatyr. Jedel medısınalyq járdem qyzmetiniń avtoparki 37%-ǵa jańartyldy, – dep málimdedi Darhan Satybaldy.
Sonymen qatar Almaty ákimi Darhan Satybaldy brıfıń barysynda aıtylǵan qoǵamdyq densaýlyq kórsetkishterindegi oń serpinge de erekshe toqtaldy.
"Osy jyldyń 11 aıynyń qorytyndysy boıynsha ana ólimi 48,2%-ǵa, náreste ólimi 5,4%-ǵa, al onkologıalyq aýrýlardan bolatyn ólim-jitim 16%-ǵa tómendedi", – dedi qala ákimi.
Ákimniń aıtýynsha, jastar saıasaty da nazardan tys qalmady.
"Elimizdiń bolashaǵy – jańa býyn. Biz olardyń bilim alýyna jáne jumyspen qamtylýyna aıryqsha mán beremiz", – dedi Darhan Satybaldy.
2025 jyly Almatyda 11 komúnıtı ortalyq jáne 4 "Narco-STOP" ortalyǵy ashyldy, sondaı-aq 33 demalys ortalyǵy jańǵyrtyldy. Stýdenttik jataqhanalarda 8 myńnan astam oryn jasaqtaldy. "Almaty jastary" baǵdarlamasy aıasynda bilim berý, densaýlyq saqtaý, ǵylym, mádenıet, sport jáne jýrnalısıka salalarynda eńbek etetin mamandardy qosqanda, 2 200 adamǵa turǵyn úıge arnalǵan nesıe berildi.
Sonymen qatar qalada 3 shynyqtyrý-saýyqtyrý kesheni ashylyp, kóshe sport túrlerine arnalǵan 50 nysan salyndy. Keshendi sharalardy iske asyrý nátıjesinde NEET sanatyndaǵy jastardyń úlesi 8,3%-dan 6,4%-ǵa deıin tómendedi, – dep málimdedi Almaty ákimi.