Ortalyq komýnıkasıalar qyzmetiniń alańynda ótken brıfıń barysynda Almaty qalasynyń ákimi Darhan Satybaldy kólik ınfraqurylymyn damytýǵa jáne qoǵamdyq kóliktiń tıimdi júıesin qalyptastyrýǵa baǵyttalǵan keshendi jobalardyń iske asyrylyp jatqanyn málimdedi.
Ákimniń aıtýynsha, qalada jol ınfraqurylymy baǵytynda birqatar mańyzdy joba qolǵa alynǵan. Bıyl Seıfýllın dańǵyly men Jansúgirov kóshesiniń qıylysyndaǵy jolaıyryq paıdalanýǵa berildi, Abaı dańǵyly uzartylyp, qozǵalys ashyldy, 35 shaqyrym jańa avtomobıl joly salyndy, sondaı-aq 281 shaqyrym jolǵa ortasha jóndeý júrgizildi. Sonyń nátıjesinde jaqsy jáne qanaǵattanarlyq jaǵdaıdaǵy joldardyń úlesi 95 paıyzǵa jetti.
Sonymen qatar, №7 qalalyq aýrýhana men "Sálem" bazary mańynda eki kólik toqtaıtyn kesheniniń qurylysy aıaqtaldy. Qoǵamdyq kólik baǵyttarynyń yńǵaıly aýysýyn jáne ózara baılanysyn qamtamasyz etý maqsatynda "Saıahat" kólik toqtaıtyn torap aýmaǵynda jumys jalǵasyp jatyr.
Qalanyń qoǵamdyq kólik parkin jańǵyrtý aıasynda bıyl 940 gazben júretin avtobýs satyp alyndy, onyń ishinde 340 birligine jeke tasymaldaýshylar qarjy bólgen. Sondaı-aq jeke kompanıalar 153 elektrobýs satyp aldy. Osy jyly jolaýshylar sany 33 paıyzǵa ósip, táýligine 1,6 mln jol júrý sanyna jetti.
"Qalanyń zamanaýı kólik júıesin qalyptastyrý – Almatynyń negizgi basymdyqtarynyń biri. Osyǵan baılanysty Almaty oblysy aýmaǵynda radıaldy joldardy uzartý jáne jolaıyryqtaryn salý týraly sheshim qabyldandy. Bul jobalar Almaty qalasynyń búdjeti esebinen júzege asyrylady. Sonyń nátıjesinde Úlken Almaty aınalma avtomobıl jolymen (ÚAAAJ) kólik baılanysy jedel ári aglomerasıanyń ózara baılanysy kúsheıedi. Sondaı-aq 2026 jyly "Qalqaman" metro beketin paıdalanýǵa berý josparlanyp otyr. Aldaǵy úsh jyl ishinde birinshi jeli "Barlyq" bazaryna deıin jetkiziledi. Qazirgi tańda metronyń ekinshi jáne úshinshi jelileri jobalanyp jatyr. Joǵary jyldamdyqty BRT baǵytyn damytý jalǵasady. Úsh jańa avtobýs parkin salý jumystary bastaldy. Avtobýs júrgizýshileriniń qaýipsizdigi men demalysyn qamtamasyz etý úshin 20 turaq-aınalý alańy salynady. Sonymen qatar kólikke aýysyp minýge arnalǵan úsh torap qurylyp, bul qala men qala mańyn baılanystyratyn yńǵaıly aýysý núktesine aınalady", – dedi Darhan Satybaldy.