Almatyda Memleket basshysynyń 2,5 mln aǵash egý jónindegi tapsyrmasyn iske asyrý jalǵasyp keledi. Bul týraly Almaty qalasynyń ákimi Darhan Satybaldy Qazaqstan Respýblıkasy Prezıdenti janyndaǵy Ortalyq komýnıkasıalar qyzmetinde ótken brıfıń barysynda jýrnalıs suraǵyna jaýap bere otyryp málimdedi.
Ákimniń aıtýynsha, kógaldandyrý baǵdarlamasy 2030 jylǵa deıin eseptelgen jáne búgingi tańda josparlanǵan kólemniń jartysy oryndalǵan. Kelesi kezeń aıasynda qalada qosymsha shamamen 1,3 mln aǵash pen buta egý kózdelip otyr.
Almaty ákimi qalada kógaldandyrýǵa qatysty tásilder qaıta qaralyp jatqanyn atap ótti. Atap aıtqanda, sandyq kórsetkishterge ǵana emes, egiletin materıaldyń sapasyna da basymdyq berilip otyr.
"Biz egý tehnologıasyn ózgertemiz jáne iri kólemdi aǵashtardy qoldanýǵa kóshemiz. Sarapshylarmen birlesip, qalalyq ekologıa men joǵary kólik júktemesi jaǵdaıynda jaqsy beıimdeletin aǵash túrleri iriktelip jatyr. Aldaǵy ýaqytta sanǵa emes, jasyl jelektiń sapasy men tózimdiligine basymdyq beriledi", – dedi qala basshysy.