Qazaqstan Respýblıkasynyń İshki ister mınıstri Erjan Sadenov Almaty qalasyna jumys sapary aıasynda 2023 jyly İİM bastamasymen qurylǵan Tálimgerler keńesiniń múshelerimen kezdesý ótkizdi.
Mınıstrdiń aıtýynsha, bul bastama respýblıka kóleminde keńinen qoldaý taýyp, búginde elimizdiń ár óńirinde 65 tálimgerlik keńes tabysty jumys isteýde. Ótken jyly ǵana aýdandyq keńesterdiń 821 otyrysy ótkizilip, ishki ister organdarynyń qyzmetin jetildirý, tártip pen zańdylyqty qamtamasyz etý máseleleri jan-jaqty talqylanǵan, dep habarlaıdy aqshamnews.kz Polisia.kz-ke silteme jasap.
– 2023 jyl kadr resýrstaryn jaqsartý jyly bolyp jarıalanǵan edi. Osyǵan oraı, İİM basshylyǵy ardagerlerdi jeke qurammen tárbıe jumysyna belsendi tartý mindetin alǵa qoıdy. Búginde Almaty qalasynda İİM-niń qurmetti qyzmetkerleri sanalatyn 13 ardager polısıa departamentiniń barlyq qyzmetteri men bólimsheleriniń kýratorlary retinde bekitilgen, – dedi Erjan Sadenov.
Mınıstr Tálimgerler keńesiniń qyzmetine joǵary baǵa bere otyryp, ardagerlerdiń jas qyzmetkerlerge adamgershilik, patrıottyq jáne kásibılik baǵytyndaǵy tárbıe berýdegi mańyzdy rólin atap ótti.
– Qurmetti ardagerler! Sizder jas polıseılerge Otanǵa degen súıispenshilikti, adaldyq pen joǵary kásibılikti sińirýde baǵa jetpes úles qosyp kelesizder. Memleket Táýelsizdiginiń bastaýynda turyp, Qazaqstan polısıasynyń qalyptasýyna atsalysqan sizderdiń ómirlik tájirıbelerińiz, danalyqtaryńyz jáne biliktilikterińiz búginde jańa formattaǵy polısıa qyzmetkerlerin tárbıeleý isinde erekshe mańyzǵa ıe, – dedi mınıstr.