Almatyda «Qazaq eskertkishtanýy boıynsha ǵylymı-zertteý ortalyǵynyń» saltanatty ashylý rásimi ótti.
Ǵylym Ordasy ǵımaratynda Sh.Sh. Ýálıhanov atyndaǵy Tarıh jáne etnologıa ınstıtýty resmı ótken jyly qyrkúıekte qurylǵan «Qazaq eskertkishtanýy boıynsha ǵylymı-zertteý ortalyǵynyń» saltanatty ashylý rásimin ótkizdi.
Ortalyqtyń qurylýy qazirgi Qazaqstan úshin eskertkishtanýdyń ózekti ǵylymı-tájirıbelik baǵytynyń mańyzdy rólin kórsetedi. Sondaı-aq Ulttyq Ǵylym Akademıasynyń júıesindegi eskertkishtaný dástúri ispetti arnaıy maqsatty jasalǵan irgeli eńbekteriniń jalǵasy bolyp tabylady.
«Aıta ketken jón, Qazaqstanda 150 myńnan asa elimizdiń ótkenin tanýǵa, san alýan mádenıetin bilýge taýsylmas derek kózi bolatyn tarıhı-mádenı, kórkemdik mańyzǵa ıe eskertkishter bar. Olar ıdeologıalyq, nasıhattyq, ekonomıkalyq mańyzǵa ıe jáne qazirgi qazaqstandyq qoǵam ómirinde ózindik orny bar. Keń baıtaq dalada tarydaı shashylǵan kóne qurylystar men keshenderdiń mańyzdylyǵy qazirgi kúngi geosaıası turǵydan qıyn-qystaý kezeńde tipten arta túspek, óıtkeni olar terıtorıalyq tutastyqtyń, memleket táýelsizdiginiń negizi bolatyn tarıhı-mádenı irgetasy bolyp tabylady.
Qazirgi tańda tez buzylyp, joǵalyp jatqan biregeı eskertkishterdi keshendi zertteý, atrıbýsıa, qorǵaý, qaıta qalpyna keltirý, saqtaý jáne ary qaraı paıdalaný jalpy memlekettik mańyzy bar mindet», – dep habarlady shara uıymdastyrýshylary.
Saltanatty ashylý rásimine ǵalymdar, arheolog, arhıtektorlar, ınstıtýt ǵalymdary qatysty. Sondaı-aq is-shara barysynda foto jáne kitap kórmeleri uıymdastyryldy, Shyǵys elderiniń Halyqaralyq akademıasynyń korespondent-múshesi S.E. Ájiǵalı leksıa oqydy.