Qazaqstanda óndiristik jaraqattanýdy tómendetý boıynsha jumystar josparly túrde júrgizilip jatyr.
Qabyldanǵan sharalardyń nátıjesinde sońǵy 5 jylda óndiriste zardap shekkenderdiń sany 6,5%-ǵa, qaza tapqandar sany 8,4%-ǵa azaıdy, dep habarlaıdy Almaty-akshamy.kz Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Álemde jyl saıyn 270 mln-ǵa jýyq jazataıym oqıǵa jáne 2 mln-nan astam adam ómirin qıǵan 160 mln kásibı aýrý tirkeledi.
Qazaqstanda jyl saıyn kásiporyndarda 1500-den astam jazataıym oqıǵaǵa jol beriledi, onyń 200-ge jýyǵy ólimmen aıaqtalady.
Ekonomıka salalary bólinisinde zardap shekkenderdiń eń kóp sany taý-ken metalýrgıa kesheniniń kásiporyndarynda – 16,2%, qurylys salasynda – 15% baıqalady.
Qazirgi kezde 386 myńnan astam jumyskerler zıandy jáne qaýipti eńbek jaǵdaılarynda jumys isteıdi. Shý men diril deńgeıiniń joǵarylaýy jaǵdaıynda árbir ekinshi (46,8%), jumys aımaǵynyń gazdanýy men shańdanýynyń joǵarylaýy – árbir úshinshi (33,2%) jáne qolaısyz temperatýra rejıminde – árbir altynshy (16,7%) adam jumys isteıdi. Aýyr dene eńbegimen 102,7 myń (6,1%) jumysshy aınalysady.
2022 jyly 680 myń qyzmetker zıandy eńbek jaǵdaılarynda jumys istegeni úshin túrli ótemaqy aldy. Osy maqsattarǵa jumys berýshiler 207,6 mlrd teńge bóldi, bul 2021 jylmen salystyrǵanda 24% - ǵa artyq.
Salaýatty jáne qaýipsiz eńbek jaǵdaılaryn odan ári qamtamasyz etý úshin Eńbek jáne halyqty áleýmettik qorǵaý mınıstrligi sharalar keshenin qabyldaýda.
2022 jyldyń qorytyndysy boıynsha eńbek qaýipsizdigi jáne eńbekti qorǵaý salasyndaǵy buzýshylyqtar úshin 119 laýazymdy adam atqaratyn laýazymynan bosatyldy. Quqyq qorǵaý organdaryna jazataıym oqıǵalar boıynsha 1094 materıal jiberildi, olar boıynsha 192 qylmystyq is qozǵaldy. Jumys oryndarynda eńbek jaǵdaılarynyń naqty jaı-kúıin baǵalaý maqsatynda 7061 óndiristik obektini atestattaý ótkizildi.
Buzýshylyqtardyń aldyn alý jáne boldyrmaý maqsatynda elimizdiń 3211 kásiporny eńbek qaýipsizdigi jáne eńbekti qorǵaý standarttaryn engizdi.
2019 jyldan bastap «Nóldik jaraqat – Vision Zero» tujyrymdamasyn ilgeriletý boıynsha jumystar belsendi júrgizilýde. Búgingi tańda oǵan 425 kásiporyn qosyldy.