Balalardy arnaıy psıhologıalyq-pedagogıkalyq qoldaý aıtarlyqtaı keńeıip keledi.
Qazaqstanda Balalar jylynda 6 psıhologıalyq-medısınalyq-pedagogıkalyq konsýltasıa, 19 psıhologıalyq-pedagogıkalyq túzetý kabıneti jáne 7 ońaltý ortalyǵy ashylady, dep habarlaıdy Almaty-akshamy.kz Ortcom.kz caıtyna silteme jasap.
Oqý-aǵartý mınıstrliginiń málimetinshe, olar balalarǵa áleýmettik medısınalyq-pedagogıkalyq jáne túzetý arqyly qoldaý kórsetýge qajettilik bar óńirlerde qurylady. Búgingi kúni elimizde 88 psıhologıalyq-medısınalyq-pedagogıkalyq konsýltasıa, 211 psıhologıalyq-pedagogıkalyq túzetý kabıneti, 14 ońaltý ortalyǵy jáne 213 arnaıy bilim berý uıymy jumys isteıdi.
«PMPK, túzetý kabınetteriniń sany jyl saıyn artyp keledi. Oqý-aǵartý mınıstrligi bul jumysty baqylaýda ustap otyr. Byltyr Qaraǵandy, Aqtaý qalalarynda, Mańǵystaý oblysynyń Beıneý aýdanynda, Almaty oblysynyń aýyldarynda jáne Qapshaǵaı qalasynda psıhologıalyq-medısınalyq-pedagogıkalyq konsýltasıalar ashyldy. 2021 jyly 13 túzetý kabıneti ashyldy. Osylaısha, balalardy arnaıy psıhologıalyq-pedagogıkalyq qoldaý aıtarlyqtaı keńeıip keledi», - dedi Oqý-aǵartý mınıstrligi Arnaıy jáne ınklúzıvti bilim berýdi damytýdyń ulttyq ǵylymı-praktıkalyq ortalyǵynyń dırektory Áıgerim Kúderınova.
Sonymen qatar elimizde arnaıy bilim berý uıymdarynyń sany da aıtarlyqtaı ósti. Balalar jylynda Taraz, Oral jáne Qaraǵandy qalalarynda aýtızmi bar balalarǵa arnalǵan 3 qoldaý ortalyǵy ashyldy. Erekshe balalarmen tájirıbeli mamandar jumys isteıdi. Ońaltý jáne psıhologıalyq-pedagogıkalyq túzetý qyzmetteri memlekettik qyzmet bolyp esepteledi jáne ol tegin kórsetiledi.