Qala ákiminiń orynbasary Álisher Ábdiqadyrov Túrkıadan kelgen ınvestormen kezdesti, ol - İskefe tobynyń oryndaýshy komıtetiniń múshesi Sertash Ahmet Levent. Eki tarap Almaty ındýstrıalyq aımaǵynda jelatın óndiretin zaýyt salýǵa qatysty birqatar suraqtardy talqylady, dep habarlaıdy Almaty-akshamy.kz.
Sheteldik kompanıanyń jobasy Almaty qalasynyń Óńirlik úılestirý keńesiniń 2021 jylǵy 21 jeltoqsandaǵy hattamalyq sheshimine sáıkes ındýstrıalyq aımaq qatysýshylarynyń tizimine engizilgen. Jobany júzege asyrý úshin 4,5 ga jer ýchaskesi bólindi. Investor bolashaqta 100-den astam turaqty jumys ornyn qamtamasyz ete otyryp, zaýyt qurylysyna shamamen 9,8 mlrd. teńge salýdy josparlap otyr. Kásiporynnyń óndiristik qýaty jylyna 7 myń tonnadan astam «Halal» standartty jelatın shyǵarýǵa múmkindik beredi. Qazirgi ýaqytta «Halavet KZ» JSHS jobalyq qujattamany Qazaqstannyń qurylys normalary men standarttaryna beıimdeý rásimin júrgizýde. Zaýyt 2024 jyly ashylady dep josparlanyp otyr.
Jelatın óndirisi úshin shıkizat retinde jergilikti İQM terileri paıdalanylmaq, ıaǵnı el aýmaǵyn qamtý úlesi keminde 60%-dy quraıdy. Kompanıa mamandarynyń aıtýynsha, búgingi tańda Qazaqstanda tamaq, kosmetıkalyq jáne farmasevtıkalyq ónerkásip kásiporyndary óz ónimderin óndirý úshin jelatındi tek shetelden aldyrtady, sondyqtan Almatyda zaýytty ashý otandyq óndirýshilerge sapaly shıkizattyń qoljetimdi bolýyna múmkindik beredi.
Anyqtama:
«Halavet KZ» JSHS 1957 jyly Túrkıada qurylǵan Iskefe holdıńiniń quramyna kiredi jáne 7 teri zaýytyn, jelatın, aqýyz, gıdrolızattar, janýarlarǵa arnalǵan suıyq amınqyshqyldaryn óndiretin zaýyttardy, ǵylymı-zertteý ortalyǵy men synaq zerthanalaryn biriktiredi. Eýropa men Azıanyń saýda naryǵyndaǵy sıyr jelatınine álemdik qajettiliktiń 6%-y Iskefe Holding úlesine tıesili.