Memleket basshysy Qasym-Jomart Kemelulynyń «Jańa Qazaqstan: jańarý men jańǵyrý joly» atty halyqqa Joldaýy elimizdiń saıası jáne ınstıtýsıonaldy damýyndaǵy jańa kezeńniń bastaýy boldy degen oıdamyn.
Prezıdent elimizde qordalanǵan problemalardy jáne qoǵamnyń kóterip júrgen túbegeıli máselelerin sheshý maqsatynda ári Qazaqstandaǵy bıliktiń baǵyttary arasyndaǵy balansty qamtamasyz etý jáne demokratıa qundylyqtaryn nyǵaıtý maqsatynda úlken reformalardy belgiledi.
"Memleket ár ýaqytta halyqtyń pikirimen sanasýy qajet. Osy rette birneshe jyl buryn ázirlenip, iske asyryla bastaǵan «Halyq únine qulaq asatyn memleket» qaǵıdatynyń mańyzdylyǵyna kóz jetkizdik. Joldaýda «Halyqqa qajetti reformalardy júzege asyrý – meniń Memleket basshysy retindegi basty mindetim. Saıası jańǵyrý bolmasa, elimizdi ornyqty damytý, aýqymdy áleýmettik-ekonomıkalyq ózgeris jasaý múmkin emes" dep naqty málimdelgen bolatyn.
Keshendi reformalardyń alǵashqysy – Qazaqstan sýper prezıdenttik bılikten qaýhary mol parlamenttik respýblıkaǵa tranformasıalanýy. Jalpy, elimizde iske asyrylyp kele jatqan demonopolızasıa, shaǵyn jáne orta bıznestiń keńinen damýyna jol ashý, qarapaıym azamattardyń óz jeke bıznesin bastaýǵa mol múmkindikter berýge arnalǵan ózgerister tizbegi oryndy dep esepteımin. Sebebi, ekonomıkalyq qaǵıdattar men tájirıbelerge júginsek, kúshti memleket pen turaqty qoǵam – turmysy qalypty orta topqa jatatyn azamattardyń úles salmaǵynyń mol bolýyna tikeleı baılanysty.
Kelesi mańyzdy másele – jergilikti ókildi bıliktiń, ıaǵnı máslıhattyń jumysyn jetildirip, rólin kúsheıtý. Prezıdent naqty atap ótkendeı, «Azamattardyń ókildi bılikke degen senimin nyǵaıtý úshin máslıhattarǵa basa mán bergen jón. Myqty máslıhattar ózekti máselelerdiń sheshimin tabýǵa jáne aımaqtardaǵy turmys sapasyn jaqsartýǵa áser ete alady». Aldaǵy ýaqytta máslıhattarǵa óńir ákimderin usyný barysynda Prezıdent eki úmitkerdiń kandıdatýrasyn engizetin bolady.
Máslıhat – halyqtyń múddesin bildirip, azamattardyń turmysyn arttyrý, aýmaq sheńberindegi mańyzdy sheshimder men erejelerdi qabyldaý, qoǵamdyq tyńdaýlar ótkizý jáne óńirdiń áleýmettik-ekonomıkalyq damýyna zor úles qosýǵa arnalǵan ókildi organ. Almaty máslıhaty jurtshylyqpen tyǵyz jumys istep, jańa bastamalar men iri jobalardyń uıytqysy bolyp keledi. Jaqynda elimizde alǵash ret Almaty qalasynda búdjettiń jobasy pysyqtalyp, qalyptastyryla bastaǵanda, birinshi kezekte máslıhat depýtattarynyń qaraýyna engizý jónindegi qala ákiminiń ókimi kúshine endi. Depýtattar halyq úshin, belgili bir kósheler men shaǵynaýdandardyń turǵyndary úshin áleýmettik mańyzǵa ıe suraqtar men ózge ózekti máselelerdi búdjet jobasyna bastapqy kezeńde engizetin bolady. Bul - úlken reformalardyń alǵashqy qadamdary.
Aldaǵy jaqyn ýaqytta, konstıtýsıalyq zańdarǵa ózgerister engizilgennen keıin máslıhattar jumysynyń qarqyny artyp, el múddesin qorǵaý jolyndaǵy quzyreti kúsheıtiletin bolady.