«Vechernıı Almaty» gazetiniń 85 jyldyǵyna arnalǵan kitaptyń tusaýkeser rásimi ótti
Ál-Farabı atyndaǵy Qazaq ulttyq ýnıversıtetiniń jýrnalısıka fakúltetinde Qazaqstan Jýrnalıser odaǵynyń bólimshesi ashyldy. Alǵashqy sóz kezegin QR Jýrnalıser odaǵynyń tóraǵasy Seıitqazy Mataıuly alyp, jınalǵan kópshilikti osynaý qýanyshty merekeli kúnmen quttyqtady.
– Bul qarashańyraq qolyna qalam ustaǵan barlyq aqparat salasy qyzmetkerleriniń týǵan úıi ispetti. Bárimiz osy jerden túlep ushtyq. Qıyn da qyzyq salanyń álippesin oqyp, úırendik. Búgin men de, sizder sıaqty ushqan uıama úlken tolǵanyspen, qýanyshpen kelip turmyn. Elimizge belgili jýrnalısıka salasynyń naǵyz maıtalmandary osynda bas qosyp otyr. Jýrnalıser odaǵynyń elimiz boıynsha bes júzden astam múshesi bolsa, ózimizdiń týǵan fakúltetimizden QR Jýrnalıser odaǵynyń bólimshesin ashýdy kópten beri armandap kelgen edim. Búgin sáti kelgen syńaıly, – degen Odaq tóraǵasy elimizdiń basqa óńirlerinde de mundaı bólimshelerdiń ashylatynyn jetkizdi.
Sóz kezegin alǵan Qazaq ulttyq ýnıversıtetiniń prorektory Álıa Másálimova oqý ordasynda «Tórtinshi bılik» bólimshesiniń ashylýyna baılanysty joǵary oqý orny rektorynyń quttyqtaýyn jetkizdi. Sodan keıin Qazaqstan Jýrnalıser odaǵy men Qazaq ulttyq ýnıversıteti arasyndaǵy Yntymaqtastyq týraly Memorandýmǵa qol qoıyldy. Osydan soń sharaǵa qatysýshylar ýnıversıtette ashylǵan belgili kósemsóz sheberi Jumabek Kenjalın atyndaǵy dárisqanaǵa jınalyp, dál osy qýanysh aıasynda tanymal qoǵam jáne memleket qaıratkeri, jazýshy-jýrnalıst Saǵymbaı Qabashuly Qozybaevtyń myń jasaǵan shahardyń shejiresine aınalǵan «Vechernıı Almaty» gazetiniń 85 jyldyǵyna oraı shyǵarǵan «Moıa Vecherka» jańa kitabynyń tusaýkeser rásimin jasady.
Rásim barysynda shahar shejiresine aınalǵan «Moıa Vecherka» kitabynyń jaryqqa shyǵýyna uıytqy bolǵan «Alataý Aqparat» jaýapkershiligi shekteýli seriktestiginiń bas dırektory Tólemis Baqtybaıuly Kúlmuhamedov Qazaqstan Jýrnalıser odaǵynyń Altyn medalimen marapattaldy