Elimizde alǵash ret uıymdastyryldy
Almatyda TMD-ǵa qatysýshy memleketter qarýly kúshteri Dostastyq elderi Qorǵanys mınıstrleri keńesiniń 30 jyldyǵyna arnalǵan III áskerı-sporttyq oıyndary aıaqtaldy, dep habarlaıdy Almaty-akshamy.kz BAQ.KZ-ke silteme jasap.
Qazaqstan Respýblıkasy Qorǵanys mınıstrliginiń Ortalyq sport klýby alańdarynda shekaralas shet elderdiń jeti elinen 250-den astam sportshy áskerı-sporttyq kópsaıystyń bes túrinen synǵa tústi. Áskerıler armıalyq qoıan-qoltyq urys, shtattyq qarýdan oq atý, áskerılendirilgen kros, ofıserlik úshsaıys jáne gir kóterýden ózara myqtyny anyqtady.
«TMD áskerı sportshylarynyń oıyndary elimizde alǵash ret ótkizildi. Jospar boıynsha sporttyq is-shara 2020 jyly ótýi kerek bolatyn. Alaıda, pandemıaǵa baılanysty sporttyq jarystardy keıinge shegerýge týra keldi. Jarys joǵary deńgeıde ótkizilip, sporttyq rýh pen áskerı dostyqtyń jarqyn kórinisin kórsetti. Tóreshiler quramy barynsha ádil jáne kásibı túrde jumys isteı aldy», – dedi óz sózinde jarysty qorytyndylaǵan QR Qorǵanys mınıstrligi Ortalyq sport klýbynyń bastyǵy – Sport komıtetiniń tóraıymy, Olımpıada oıyndarynyń chempıony ári Eńbek sińirgen sport sheberi Olga Shıshıgına.
Jalpykomandalyq birinshilikte Reseı Qarýly kúshteriniń quramasy jeńiske jetse, Ózbekstan áskerı sportshylary ekinshi, Qazaqstan quramasy úshinshi orynǵa turaqtady.
Esterińizge sala keteıik, TMD áskerleriniń birinshi jáne ekinshi áskerı-sporttyq oıyndary Reseı men Qyrǵyzstanda sáıkesinshe 2015 jáne 2017 jyldary ótkizilgen. Tórtinshi oıyndar Ózbekstanda uıymdastyrylatyn bolady.