Aımaqta aǵashtyń sany 47 paıyzǵa artady
Almatyda Oqýshylar saraıynyń alańynda jyl sońyna deıin rekonstrýksıa jasalady. Biraq jóndeýdiń jobasy ózgergen. Iaǵnı jańa josparǵa sáıkes, atalǵan aýmaqtyń tarıhı qalpy saqtalyp, tıisinshe jańartý jumystary júrgizilmek, dep habarlaıdy Almaty-akshamy.kz Almaty.tv-ge silteme jasap.
Qaladaǵy tarıhı-mádenı mura sanalatyn nysanǵa kúrdeli jóndeý júrgizilmegeli bıyl 15 jyldan asyp otyr.
BLIS:
1. Oınaıtyn jer kerek dep oılaımyn. Sol 10-12 jasarǵa deıingi. Óıtkeni, arǵy jaǵynda sport alańy bar. Biraq ol kishkentaı balalarǵa az.
2. Joldyń jóndelýi, jasyl qalamyzdyń órkendeýi ózimizge paıdaly dep oılaımyn.
3. Almaty qalasynda ádemi jerdik suryqsyz bop kqrinýi unamaıdy, árıne. Maǵan da. Syrt kózge de jaǵymsyz kórinis bolyp tur.
Saıabaqty jańartý boıynsha alǵashqy joba 2018 jyly ázirlengen. Oǵan sáıkes, jasyl jelekter otalyp, alańnyń bastapqy beınesi ózgertilýi kerek edi. Endigide, turǵyndar tarapynan túsken aryz-shaǵym negizge alynyp, qaıta qurýdyń jańa jospary bekitilip otyr.
«Jaıaý júrginshiler joly sol qalpy, eshteńesi ózgermeıdi. Tek qatty jabyndy brýschatka salamyz. Brýschatkalardy aýystyramyz jáne de jaryqshamdary aýysady. Az ǵana ózgeris bolady. Sońǵy joba boıynsha negizgi tarıhı kelbeti ózgermeıdi. Sondyqtan da turǵyndarmen kezdesip, túsindirip berip otyrmyz», – dedi Ekologıa jáne qorshaǵan orta basqarmasy basshysynyń mindetin atqarýshy Serik Ádilbaev.
Naqtylaı ketsek. Jobada qarastyrylǵan negizgi jumystarǵa mundaǵy sýarý men jaryq júıesin qalpyna keltirý, oıyn alańdaryn jasaý, sondaı-aq júrginshiler ınfraqurylymyn jańartý jatady. Kópti alańdatqan granıt jabyndary qaıta ornatylatynyn aıta ketken jón. Jasyl jelektiń jaıy da belgili boldy.
Qazir saraı aýmaǵynda 889 aǵash bar. Jańa jobada mundaǵy jasyl jelektiń sanyn arttyrý kózdelip otyr. Iaǵnı, jyl sońyna deıin taǵy da 420 qylqanjapyraqty, japyraqty tal egiledi degen sóz. Aımaqta aǵashtyń sany 47 paıyzǵa artady.
Aýmaǵy 5 gektar bolatyn alańda rekonstrýksıa 2 apta buryn bastalǵan. Mamandar bıylǵy qarashanyń sońyna deıin tıisti jumystar aıaqtalady deıdi.