Qujatty jarıa talqylaý 21 sáýirge deıin jalǵasady.
Ulttyq bank Memleket basshysynyń Jarlyq jobasyn jarıa talqylaýǵa usyndy, dep habarlaıdy Almaty-akshamy.kz
Ulttyq valútanyń aınalysqa engizilgenine 30 jyl tolý qurmetine arnalǵan merekelik medal ázirlenedi.
«Teńgege 30 jyl» merekelik medali taǵaıyndalsyn. Qosa berilip otyrǵan «Teńgege 30 jyl» merekelik medalimen nagradtaý qaǵıdalary jáne merekelik medaldiń sıpattamasy bekitilsin», delingen qujatta.
Merekelik medalmen QR azamattary men sheteldikter marapattalatyn bolady.
Jarlyqty qabyldaý respýblıkalyq búdjetten qosymsha shyǵystardy talap etpeıdi. Qujattan týyndaıtyn shyǵystar QR Ulttyq Banki búdjetiniń qarajaty esebinen júzege asyrylady.
«Teńgege 30 jyl» merekelik medaliniń sıpattamasy:
Merekelik medal ilgishten jáne qatqyl lentasy bar taǵannan turady;
Merekelik medal dıametri 32 mm durys sheńber nysanynda melhıordan – nıkelmen mys qospasynan jasalǵan;
Medaldiń bet jaǵynyń (aversiniń) ortalyq bóliginde merekelik kúndi bildiretin jáne onyń tarıhı mańyzdylyǵyn arttyra túsetin «30» sanynyń iri beınesi ornalasqan, sannyń joǵarǵy jaǵynda bas áriptermen «TEŃGEGE» degen jazý, sol jaqta «JYL» degen jazý beınelengen;
«30» sanynyń beınesi qarqyndy damyp kele jatqan jahandyq sıfrlyq álemde dınamıkalyq qozǵalysty, belgilengen vektor men baǵytty beıneleıtin shyǵyńqy bederli syzyqtar túrinde merekelik medaldiń búkil betinde birneshe ret qaıtalanady;
Merekelik medaldiń syrt jaǵynda (reversinde) daıyndaýshy – Qazaqstan teńge saraıynyń logotıpi beınelengen;
İlgish qulaqsha men saqına arqyly taǵanǵa jalǵanady. Bıiktigi 40 mm tikburysh nysanyndaǵy taǵan eki jaǵynan eni 25 mm tesikteri bar eki kóldeneń tórtburyshty nysandarmen qosylǵan;
Taǵan eni 20 mm jasyl tústi qatqyl lentamen – tolqyn tárizdi qubylmaly tyǵyz jibek matamen tystalǵan. Qatqyl lentanyń syrt jaǵynda merekelik medal kıimge vızorly bekitkishi bar túıreýish arqyly bekitiletin bekitpe bar.