Mamandardyń aıtýynsha, úı tazalap, zattardy retpen ustaý kúızelisten qutqarady. Bir jaǵynan, bul qoljetimdi ádis bolsa, ekinshiden, endorfın deńgeıin artyrýda paıdasy zor eken. Garderobtaǵy artyq zattardan qutylyp, tazalyq jasaýdyń basqa da tıimdi jaqtaryn búginde psıhologtar jıi aıtyp júr.
Baqylaýda ustaý jáne qaýipsizdik sezimi
Tazalyq júrgizý bizge aınalamyzdaǵyny qadaǵalap jáne onda ne bolyp jatqanyn baqylaýda ustaýdy sezindiredi. Psıhologtardyń paıymdaýynsha, adamdar ómirdi bir ýysta ustap turatyndaı baqylaı almaǵanmen, úıimizdiń tazalyǵyn qadaǵalaý qolymyzdan keledi. Sonymen qatar ondaı sezim adamdarda senimdilik týdyryp, kóńil-kúıge oń áser etedi eken.
Nazarymyzdy shoǵyrlandyrý
Úıdiń ishiniń retsiz ybyrsyp jatýy adamnyń tez sharshaýy men stresske ushyraýyna tikeleı áser etetin kórinedi. Prınston ýnıversıtetinde júrgizilgen zertteý nátıjesinde ybyrsyǵan, shashyrańqy bólmede kóńil toqtatyp, bir iske den qoıý muntazdaı etip jınalǵan, taza bólmege qaraǵanda áldeqaıda qıyn ekenin kórsetken. Bizdiń kózimiz ózimiz aınalysyp otyrǵan iske esh qatysy joq obektilerge nazary aýa beretin kórinedi.
Iaǵnı, ózimizge bar oıymyzben aldymyzdaǵy noýtbýk ekranyna ǵana qarap otyrǵandaı bolyp kórinsek te, shyn mánisinde, ústel ústindegi kofeden qalǵan shyny, qajetsiz qujattar, t.b shashylyp turǵan zattardyń bárin kózimiz ańǵaryp turady.
Sondyqtan jumystyń ónimdiligi artsyn desek, taza ústelde, jınalǵan bólmede jumys istegen abzal.
Tazalyq jasaýdyń adamǵa oń áser etetin taǵy bir tusy – naqtylyqqa ıtermeleıdi. Zertteýshilerdiń aıtýynsha, eger adam aldynda ne kútip turǵanyn bilse, ol baısaldy bolyp, ózine senimdi bola túsedi. Adamnyń mıy haos pen belgisizdikti jaqtyrmaıdy. Qandaı da bir áreketten mı qandaı nátıje bolatynyn bilgisi keledi. Sol sebepti de sabyrlyq saqtap, bosańsýdyń bir joly – úıge tazalyq júrgizý. Taza bólme men aýasy tazarǵan páterden qalaı rahattanatynyn bilgennen keıin-aq adam ózin jaqsy sezine bastaıtyn kórinedi.
Psıhıkany tazartý
Shkaf sórelerin jınap, rettep otyrý tek artyq zattardan qutylýǵa ǵana emes, sonymen birge shashyraǵan oılaryńyzdy jónge keltirýge kómektesetin kórinedi. Aınalamyzdy rettestirýdi qalamaý – bul bizdiń ishki jan dúnıemizdiń qandaı kúıde ekenin bildiredi. Depressıada júrgen adamnyń bir belgisi - úı jumystaryn jasaýǵa qulyqsyzdyq tanytýy. Ózimizdiń aınalamyzdy kóptegen qajeti joq zattarmen toltyrý arqyly biz ótkenniń qursaýynan shyǵa almaı, ómirimizge jańa bir ózgeris engizýge qorqatyndaı sezimdi bastan keshiredi ekenbiz. Iaǵnı, úıdi tazalaý arqyly biz mıymyzdy, oıymyzdy retke keltirip, sál de bolsa qobaljý men alańdaýshylyqtan arylady ekenbiz.
Ózińe degen senimdilik
Úıdi tazalap, bir jónge keltirgennen keıin, adamdar basqa da mindetterdi, meıli ol úıge qatysty bolsyn, bolmasa jumysqa qatysty isterdi qalaı bastap ketkenderin ózderi de baıqamaı qalatyn bolýlary kerek. Al jetistikke jetý sezimi taǵy da alǵa umtylyp, jańa jetistikterge talpynýǵa ıtermeleıdi. Olaı bolsa, ómirińizdi rettep alǵyńyz kelse, jaı ǵana úı tazalaýdan bastap kórińiz!