Bizdiń Qazaqstanymyzda bolǵan jantúrshigerlik jaǵdaı elimizdiń árbir azamatynyń janyna batyp, qabyrǵasyn qaıystyryp jatyr.
Bolǵan oqıǵalar bizge ashshy sabaq boldy. Iá, shyndyǵynda biz «Demokratıa-demokratıa» dep urandatqan jalǵan patrıottarǵa, arandatýshylarǵa bostandyq berdik. Osyndaı aramzalardyń arqasynda elimizge terrorıster basa-kóktep shabýyl jasap, oıran-topanymyzdy shyǵardy. Qanshama jap-jas balalarymyz óz boryshtaryn ótep júrip mert boldy. Olardyń Otan aldyndaǵy adal erlikteri el esinde qalýy tıis. Meniń bolǵan jaǵdaıǵa janym aýyryp, júregim syzdap otyr. Balasynan aıyrylyp otyrǵan ata-analarǵa, jarynan, ákesinen aıyrylǵan aǵaıynǵa qatty qınalyp, kóńil aıtamyn. Elimiz úshin, elimizdiń tynyshtyǵy úshin janyn qurban etken erlerimizdiń jandary jánnatta bolsyn!
Bizder, ardegerler, keńes zamany kezinen ártúrli qıyndyqtardy basymyzdan ótkerdik. Biraq mundaı jaýyzdyqqa halqymyz eshqashan barmaǵan edi ǵoı.
Elimizde oryn alǵan jaǵdaılar ál-Farabı babamyzdyń «Tárbıesiz berilgen bilim - adamzattyń qas jaýy» degen támsiliniń astaryn uǵyndyrǵandaı. Osy oraıda ardagerlerge jastardyń boıyndaǵy patrıottyq sezimdi oıatý úshin, qıyndyqty shydamdylyqpen, sabyrlyqpen jeńý úshin, olarmen tárbıe jumysyn jandandyrý kerek ekenin basa aıtqym keledi. Dál qazir bizge, qazaq halqyna, tórtke bólinip, beske jarylmaı, birigetin ýaqyt keldi.
Prezıdentimiz Qasym-Jomart Kemelulynyń úndeýindegi ár sózin, sheshimderin qoldaı otyryp, biz de óz tarapymyzdan kómegimizdi aıamaıyq! Elimizdiń kórkeıýine sáttilik tileımiz!