«ALMATY AQSHAMY» – 35. Bizdiń túlekter
Ardaqty aǵamyz, ulaǵatty ustazymyz Qalı Sársenbaı 2005 jyldyń kókteminde «Almaty aqshamy» gazetine jumysqa shaqyrdy. Solaısha, alyp shahardyń bas basylymynda, qazaq jýrnalısıkasynyń korıfeıleriniń biri Qalaǵańnyń qolastynda qyzmet etý baqyty buıyrdy.
Bas redaktor alǵashqy kúnnen qalanyń qym-qýyt tirshiligine, qaınaǵan qazanyna saldy da jiberdi. «Uıyqtamaıtyn Almaty», «Almatyny kimder basqardy?», «Almatyǵa syımaı ketken aqyndar», «Shahar sharýashylyǵy» sekildi jobalar ashylyp, Alashtyń aıaýly mekenine qatysty taqyryptyń, tarıhtyń barlyǵy qozǵaldy. Jurt sanasynan óship bara jatqan ýaqıǵalardyń bári gazet betinde nómir saıyn jaryq kórip jatty.
Qalı Qoshqaruly «Aqshamdaǵy» shyǵarmashylyq ujymdy aǵa býyn men jas jýrnalıserdiń tepe-teńdigin saqtaı otyryp jas aqt ady. Ótesh Qyrǵyzbaı, Sárs enbek Bekmuratuly, Ermek Jumahmetuly, Ánýarbek Áýelbek, Nurjamal Baısaqal, Raıa Eskendir sekildi maıtalman qalamgerlermen qatar Dýman Anash, Órken Joıamergen, Jandos Baıdilda, Azamat Qasym, Ásıa Baǵdáýletqyzy, Aıgerim Saýytbekova, Mánshúk Bekbosyn sekildi jastar qyzmet etti. Búginde Qalaǵańnyń qaıraǵynan ótken sol azamattar otandyq jýrnalısıkanyń mańdaıaldy mamandaryna aınaldy. Bul da Bas redaktordyń tulpardy taıynan tanıtyn qasıeti bolsa kerek.
Bir qyzyq jaǵdaı boldy. Bas redaktorǵa maqalamyzdy aparamyz. Basynda redaksıalap, kem-ketigin túzep, olqy tusyn tolyqtyryp otyratyn. Taqyryp mindetti túrde aýysady. Keıinnen maqalanyń ón boıyna tıispeıtin boldy. Biraq taqyryp ózgeredi. Qandaı taqyryp qoıyp aparsaq ta, Qalaǵańnyń talǵamyna saı kelmeıdi. Sodan kezekti bir materıaldy taqyrypsyz apardyq.
– Mynanyń taqyryby qaıda? – dedi Qalaǵań kózáıneginiń ústinen qarap.
– Taqyrypty báribir aýystyryp tastaısyz ǵoı, – dedik biz.
«Bara ber» degendeı ıegimen esikti nusqady. Shyǵyp kettik. Artymyzdan maqalamyz keldi. Taqyryby jaınap tur. Sodan Qalı aǵaǵa maqalany taqyryp qoımaı aparatyn ádet shyǵardyq. Erkeligimizdi basynda kóterip júrdi. Bir kúni shydamaı ketti.
– Áı, taqyrypsyz maqala shala týǵan bala sıaqty. Nege birtutas dúnıe ákelmeısiń? Álde, seniń maqalańa taqyryp qoıǵannan basqa jumysy joq dep oılaısyń ba? – deıdi ustazymyz kúıip. Biz de ashýyn qaljyńmen tarqatpaq boldyq pa, álde oılanbaı aıta saldyq pa, bilmeımin, taban astynda:
– Aǵa, sol úshin aılyq alyp otyrǵan joqsyz ba? – deppiz.
– Óı, kúshik, qury, – dedi de, sońynan qarqyldap kúlkige basty bastyǵymyz.
Qatty ashýlanbaǵanyna qýanyp jaırań qaǵyp ketip bara jattyq. Keıinnen osy jaǵdaıdy Qalaǵań birazǵa deıin aıtyp júrdi. Biraq bar ǵoı, sodan soń qoıǵan taqyrybymyz Bas redaktordan aýyspaı shyǵatyn boldy.
«Almaty aqshamynan» 2008 jyly «Ana tiline» aýystyq. Ujymmen qımaı qoshtastyq. Tilshilerdiń bólmesinde Ásıa, Mánshúk, Aıgerimniń kózine jas kelip, jigitter jaǵy qyzdardy jubatyp, «soǵysqa ketip bara jatqan joqpyn ǵoı» dep ázildep, ázer tarqasqan edik.
«Aqsham» meniń ómirimdegi ónegeli mekteptiń biri. Sonysymen de biz úshin qymbat, qasterli. Súıikti gazetimizdiń jaryq kórgenine 35 jyl tolyp jatyr eken. Qutty bolsyn aıtamyz. Ósip-órkendeı berińizder, qadirli áriptester!