«ALMATY AQSHAMY» – 35. Bizdiń túlekter
Osydan on segiz jyl buryn ýnıversıtetti támamdap, dıplomdy jýrnalıs retinde jumys izdep júrgen shaǵymyz edi. Stýdent kezimizde stýdentter qalashyǵynyń janyndaǵy «Sport» gazetinde bir jarym jyldaı, jańadan ashylǵan «Aıqyn» gazetinde shtattan tys, «Azamat.kz» gazetinde úsh aı jumys istep azdap tájirıbe jınap qalǵanbyz. Endi turaqty jumys tabý kerek boldy. Óıtkeni, burynǵydaı tegin jataqhana joq, páterde turý úshin qarjy kerek.
Mine, osyndaı jas túlek úshin syn sátte ýnıversıtette oqytýshymyz bolǵan belgili aıtysker, aqyn Bekjan Áshirbaev aǵamyz «Almaty aqshamyna» qaraı jol siltedi. Bekjan aǵamyz aldyn ala aıtyp qoıǵan soń birden bas redaktordyń birinshi orynbasary Nurjan Qýantaıu l y n a j o l y ǵ y p , tapsyrma alyp shyqtyq. Sol kezde baspasózde saıası taqyryptar qyzý talqylanatyn. Saıası sarapshy retinde gazet betterinen túspeıtin sarapshylar da biren-saran edi. Sol azdyń biri, saıasattanýshy Ázimbaı Ǵalı aǵamyzdyń úıine baryp, suhbat aldym. Dereý oryndalǵan tapsyrma kóp uzamaı gazettiń qalyń bolyp shyǵatyn beısenbilik sanynda «Astana men Almaty qazaqylanbaı, Qazaqstan qazaqylanbaıdy» degen taqyryppen aıqarma betti alyp jarq ete qaldy. Sol 2005 jyly gazet basshylyǵyna kelgen Qalı Sársenbaı aǵamyzdyń buıryǵy da kóp kúttirmeı, birden qala gazetiniń tilshisi retinde jýrnalısik qyzý eńbekke aralasyp ketken edik. Mine, sodan jeti jyldan asa ýaqyt eńbek etip baryp qoshtasqan bul redaksıa bizdiń «aıhaı, jıyrma besimiz» ótken jalyndy jyldarymyzdyń jarqyn kýási retinde árdaıym júregimizdiń bir buryshyn jylytyp turatynymen ystyq.
«Aqshamda» jastar birshama jınaldyq. Aldy fototilshiler Jeńis Ysqabaı, Samat Qusaıyn, tilshiler Erjan Baıtilesten bastap, Órken Joıamergen, Azamat Qasym, Ásıa Baǵdáýletqyzy, Mánshúk Bekbosyn, Áıgerim Saýytbek, Dınara Málikova, Jandos Baıdilda, Ermuhamet Máýlen, Erbol Turymbet, Aıkerim Raıysqyzy jáne t.b. qyz-jigitter qalalyq gazettiń mazmundy da oqylymdy shyǵýyna bir kisideı atsalystyq, ózimiz de ysyldyq, tanyldyq. Qazir basym bóligi ártarapta jaýapty qyzmet etip júr. Bizge aǵalyq tanytqan Qalı Qoshqarulynan bastap, Sársenbek Bekmuratuly, Ótesh Qyrǵyzbaıuly, Ánýarbek Áýelbek, Quttybek Aımahan, Aınabaı Mádı, Baqyt Oısa jáne apaılarymyz Nurjamal Baısaqal, Raıa Eskendir sekildi ǵazız jandardyń tárbıesin kórgenimizge qýanamyz.
«Almaty aqshamy» sol jyldary qalalyq gazet bolsa da respýblıkalyq kóptegen basylymdardan qyzǵylyqty, oqylymdy shyqqany esimde. Tipti, kóptegen aıdarlar, jobalar, taqyryptardyń ataýlaryna deıin áli esimde. Máselen, 2008 jyly gazettiń jıyrma jyldyǵyna oraı segiz qosymsha shyqty. Biz «Biz...» degen qoǵamdyq-saıası qosymshaǵa shyǵarýshy-redaktor boldyq. Sol kezde magıstratýrada oqıtyn Azamat Qasym «Aýla» degen qalanyń komýnaldyq qyzmetine qatysty qosymsha shyǵardy. Sonda ǵoı, birge oqyǵan dosy, qýtildi aıtysker aqyn Asqat Qylyshbek «Azamatqa qalamaqy bolsyn» dep kóshege shemishke shaǵyp, qoqys tastap júretini...
Mine, osy syqyldy qyzyqty da ańǵal jastyǵymyzdyń kýási bolǵan arý Almatynyń bas gazeti bizdi jas túlekten tas túlekke deıin baptap, ár qıaǵa ushyrdy. Osy basylymda birge istegen Áıgerim ekeýmiz shańyraq qurdyq. Toıymyzǵa búkil redaksıa qatysty. «Jas otaý» neke saraıyndaǵy saltanatty is-shara erekshe este qalatyndaı uıymdastyryldy. Sol kezde qalalyq máslıhat depýtaty retinde Qalı aǵamyz bul iske uıytqy boldy. Naýryzdaǵy neke qıý rásiminde ekken qos qaıyńymyz atalǵan saraıdyń aldynda saıaly aǵashqa aınaldy. «Aqshamnan» túlep ushqan sol jastar da búginde saıasy bar aǵashtaı elge eńbek etip kele jatqan azamattarǵa aınalyp keledi.
«Aqshamda» qazir jańa býyn eńbek etip jatyr. Olardyń elimizdiń eńseli bolýyna sińirip jatqan eren eńbegine tabys tileımiz!