Fınalda ol Ázirbaıjan atynan shyǵatyn kýbalyq boksshymen judyryqtasady
Bakýde ótip jatqan "Uly Jibek joly" halyqaralyq týrnırde qazaq boksshylary arasynda 92 kelide synǵa túsken Saǵyndyq Toǵambaı alǵashqy bolyp fınalǵa shyqty, dep habarlaıdy almaty-akshamy.kz.
Otandasymyz jartylaı fınalda Reseı ókili Ramazan Hanalıevpen kezdesip, barlyq raýndta da basymdyq tanytty. Tipti, úshinshi raýndta qarsylasynyń “usynysymen” tóbeleske de bara aldy.
Nátıjesinde reseılik boksshy ábden sharshap, aıaǵyna áreń basyp rıngten tústi. Bul rette tóreshiler jeńisti biraýyzdan Saǵyndyq Toǵambaıǵa berdi.
Endi ol fınalda álem chempıony, Olımpıada oıyndarynyń júldegeri Alfonso Loren Domıngespen judyryqtasady. Aıta ketetin jaıt, kýba boksshysy búginde Ázirbaıjan azamattyǵyn alyp, sol eldiń atynan synǵa túsýde.
Buǵan deıin jartylaı fınalda 86 kelide óner kórsetken Bekzat Tańatar jergilikti boksshy Mýrat Allahverdyevpen kezdesip, tóreshiler sheshimimen jeńilgen bolatyn.
Sondaı-aq, Qamshybek Qońqabaev pen Serik Temirjanov ta qarsylastaryna jol berip, júldeden tys qaldy.