İ toqsannyń qorytyndysy boıynsha tikeleı sheteldik ınvestısıa aǵyny 54% ulǵaıǵan
Qazaqstanǵa óndiristerdi relokasıalaýǵa barynsha qoldaý kórsetiledi. Bul týraly QR Premer-Mınıstri Álıhan Smaıylov Qazaqstan mashına jasaýshylarynyń X forýmynyń plenarlyq otyrysynda aıtty, dep habarlaıdy Almaty-akshamy.kz QazAqparatqa silteme jasap.
«Sheteldik óndiris oryndarynyń elimizge relokasıasy Qazaqstannyń mashına jasaýshylaryna qandaı múmkindik beredi?» degen suraq qoıyldy Úkimet basshysyna plenarlyq otyrysta.
«Qazirgi saıası jaǵdaı ulttyq ekonomıkamyzǵa jaǵymsyz syrtqy faktorlar ákeldi, degenmen, belgili bir múmkindikter de týǵyzady. Ázirge kórshi elde óz óndirisin jaýyp, keńselerin Qazaqstanǵa aýystyrýǵa nıet bildirgen 50-ge jýyq kompanıa bar. Biz qazir olarmen naqty kelissózder júrgizip jatyrmyz. Olarǵa arnaıy ekonomıkalyq aımaqtarda oryn beriledi, ınvestısıalar jónindegi zańnamada kózdelgen arnaıy ınvestısıalyq kelisimderge qol qoıylady, óndiris quryp, tabys tabý kezeńine salyqtyq basymdyqtar beriledi», - dep jaýap berdi Á. Smaıylov.
Onyń aıtýynsha, segiz aıdyń qorytyndysy boıynsha bizdiń ekonomıkamyzdaǵy negizgi kapıtalǵa ınvestısıa naqty mánde 6% ósti.
İ toqsannyń qorytyndysy boıynsha tikeleı sheteldik ınvestısıa aǵyny 54% ulǵaıǵan.
«Sheteldik óndiristerdi reloaksıalaý esebinen qosymsha ınvestısıalardyń kelýi – árıne, jańa jumys oryndaryn qurý, salyq salý bazasyn keńeıtý ǵana emes, jańa tehnologıalar men jańa standarttar, otandyq mashına jasaýshylardyń jáne jalpy óńdeý salasyndaǵy óndirýshilerdiń básekege qabiletin arttyrý, sondyqtan biz osyndaı óndiristerdi relokasıalaýdy barynsha yntalandyra beremiz», - dedi Úkimet basshysy.
Buǵan deıin Premer-Mınıstr otandyq mashına jasaý salasynyń respýblıka ekonomıkasynyń turaqty damýyna eleýli úles qosyp kele jatqanyn aıtty.
Máselen, ındýstrıalandyrý jyldary mashına jasaýdaǵy óndiris kólemi 6 esege ósip, 2,3 trln teńgege deıin kóterildi.
Salanyń ósimi sońǵy 3 jylda orta eseppen 20%-dy qurap otyr.