Almatyda 1921-1962 jyldary salynǵan turǵyn úı qory bar
Sybaılas jemqorlyqqa qarsy qyzmet megapolıs turǵyndaryn tolǵandyratyn asa ózekti máselelerdi qamtıtyn sybaılas jemqorlyq táýekelderiniń kartasyn anyqtady, dep habarlaıdy Almaty-akshamy.kz.
Kartaǵa sáıkes, asa ózekti baǵyttardyń biri qurylys jáne turǵyn úı, onyń ishinde, áleýmettik turǵyn úı bólý, qala mańyn damytý, áleýmettik obektilerdiń tapshylyǵy máseleleri bolyp tabylady.
Turǵyn úı-kommýnaldyq sharýashylyǵynda apatty jaǵdaılardy joıý maqsatynda qalanyń turǵyn úı qorynyń 2021-2025 jyldarǵa arnalǵan baǵdarlamasyna sáıkes turǵyn úıdi renovasıalaý, ıaǵnı eski turǵyn úıdi jańasyna aýystyrý prosesi kózdelgen.
Búgingi tańda Almatynyń kóptegen aýdandarynda negizinen 2 qabatty qańqaly-qamysty, 1921-1962 jyldary salynǵan turǵyn úı qory bar.
Sonyń ishinde Túrksib jáne Jetisý aýdandarynyń ózinde buzýǵa jatatyn 1 427 úı qamtylǵan.
Jańartý baǵdarlamasyna sáıkes qala turǵyndaryn memlekettik qarajat bólmeı jańa jaıly turǵyn úımen qamtamasyz etýde ınvestorlardy tartý kózdelgen.
Turǵyn úı qoryn jańartý jobasymen Sybaılas jemqorlyqqa qarsy is-qımyl agenttiginiń Prevensıa qyzmetiniń basshysy Saıan Ahmetjanov óńirge jumys sapary aıasynda tanysty.
Sapar barysynda tozǵan turǵyn úı qory, sondaı-aq buzylǵan úılerdiń ornyna salynǵan turǵyn úı kesheni kórsetildi.
Osy baǵdarlamany iske asyrý boıynsha jergilikti atqarýshy organdarda ǵana emes, halyq arasynda týyndaıtyn máseleler men problemalar talqylandy.