Úı ıeleri suranystyń artýyna reseılikterdiń aǵylyp kelýi sebep dep otyr
Almatyda turǵyn úı jaldaý quny bir túnde 2-3 esege qymbattap ketti, dep habarlaıdy Almaty-akshamy.kz Azattyq Ruhy-na silteme jasap.
Búgin krisha.kz saıtyna júktelgen jarnamalarǵa nazar aýdarsaq, 1 bólmeli páterdiń ortasha jaldaý quny -250 myń, 2 bólmeli- 400 myń, 3 bólmeli 700 myń teńgeniń shamasynda. Al elıtalyq turǵyn úı keshenindegi baǵa 1 mıllıon teńgeden joǵary.
Máselen, Almaly aýdanyndaǵy bas-aıaǵy 49 sharshy metr bolatyn myna páterdiń arenda aqysy 450 myń teńge. Aıta keterligi, bul - 4 qabatty eski úıler. Úı ıesi suranys kóp, sondyqtan baǵany kóterdim dep otyr. Al suranystyń artýyna reseılikterdiń aǵylyp kelýi sebep ekenin alǵa tartty.
«Qazir Almaty, Astana qalalarynda páterge suranys óte kóp. Ózim páterdi jalǵa berýmen birneshe qalalarda aınalysamyn. Ózim de jaldap turamyn. Astanada eki bólmeli páterdi 500 myń teńgege, Almatyda osy úıdi 450 myń teńgege beremin dep sheshtim. Jarnamany búgin saldym. Tańerteńgi baǵalarǵa qarap men de osyndaı baǵany qoıdym. Baǵanyń ósýine, árıne, Reseıden kelip jatqandar túrtki boldy»,- deıdi úı ıesi.
Úı ıesi «jeńildik jasaısyz ba» degen saýalǵa «450 myń teńgeniń ishine komýnaldyq tólemdi qosýǵa bolady, biraq baǵany túsirmeımin» dep jaýap berdi.