Úkimet otyrysynda QR Aýyl sharýashylyǵy mınıstriniń mindetin atqarýshy Erbol Qarashókeev eldegi jem-shóp daıyndaý barysy jaıynda baıandady, dep habarlaıdy almaty-akshamy.kz qazaqparat.kz silteme jasap.
«Bıylǵy klımat jaǵdaıy aýyl sharýashylyǵy janýarlaryn azyqpen qamtamasyz etýde belgili bir qıyndyqtar týǵyzdy. Jaǵdaıdy túzetý úshin Úkimet naqty jedel sharalar qabyldap jatyr. Jem-shóp daıyndaý máseleleri boıynsha jergilikti jáne ortalyq atqarýshy organdardyń qyzmetin úılestirý jónindegi respýblıkalyq jedel shtab qurylyp, jumys istep jatyr. Zardap shekken óńirlerge qarjylaı kómek kórsetilip jatyr. Máselen, qurǵaqshylyqtan eń kóp zardap shekken Mańǵystaý jáne Qyzylorda oblystaryna jem-shóp satyp alýǵa jumsalǵan shyǵyndaryn óteýge Úkimet rezervinen 3,8 mlrd teńge bólindi», - dedi E. Qarashókeev.
Onyń aıtýynsha, Mańǵystaý oblysyna mal azyǵyn daıyndaý maqsatynda qosymsha 5,3 mlrd teńge bólý máselesi sheshimin tapty.
«Sonymen qatar, jem-shóp daıyndaý problemalaryn sheshýge jergilikti búdjetten 9,1 mlrd teńge bólindi. Qosymsha taǵy 4,5 mlrd teńge bólý kútilip otyr. Zardap shekken óńirlderdiń aýyl sharýashylyǵy taýaryn óndirýshilerdiń nesıeleri boıynsha qaryzdaryn uzartý jáne qaıta qaraý týraly sheshim jasalyp, ótinimderdi qabyldaý bastaldy. Oblystarda azyq daıyndaý kólemin barynsha arttyrý boıynsha sharalar kesheni iske asyrylyp otyr. Óńirlerge mal azyǵyn daıyndaý maqsatynda qosymsha 43,1 myń tonna arzandatylǵan dızel otyny bólindi», - dedi mınıstrdiń mindetin atqarýshy.