Barlyq óńirge Qytaıdyń Sinopharm vaksınasynyń 1-toptamasy jetkizildi. Bul týraly Úkimet otyrysynda QR Densaýlyq saqtaý mınıstri Alekseı Soı málim etti, dep habarlaıdy almaty-akshamy.kz QazAqparatqa silteme jasap.
Búginde 1-komponentin halyqtyń vaksınasıalaýǵa jatatyn tobynyń 62 paıyzy, 6,1 mln adam vaksına aldy. Al 2-komponent 4,8 mln adamǵa salyndy. Bul halyqtyń vaksınasıalanatyn tobynyń 48 paıyzyn quraıdy», - dedi ol.
Mınıstrdiń dereginshe, koronavırýsqa qarsy vaksınalaý jumysy Shymkent qalasynda, Túrkistan, Almaty, Soltústik Qazaqstan, Shyǵys Qazaqstan, Qyzylorda oblystarynda joǵary deńgeıde júrgizilip jatyr. Al vaksınanyń 1-dozasyn alýshylar qatary Mańǵystaý oblysynda tómen. Bul óńirde halyqtyń 35 paıyzy ǵana vaksına alǵan.
«Óńirler vaksınanyń jetkilikti kólemimen qamtamasyz etilgen. Vaksına jetkizý kestege sáıkes júrgizilip jatyr. Barlyq óńirge Qytaıdyń Sinopharm vaksınasynyń 1-toptamasy jetkizildi. Jetkizý jumystary jalǵasyp jatyr», - dedi Alekseı Soı.