1-aqpan Halyqaralyq oramal merekesine arnalǵan «Qazaq analary-dástúrge jol» RQB Almaty jáne Almaty oblysy fılıaldary uıymdastyryp otyrǵan «Aq kımeshek - analar amanaty!» atty jıyny ótti, dep habarlaıdy aqshamnews.kz
Baǵdarlamada «salt-dástúrden kórinis qoıylymdar», «men tańdaǵan kımeshek úlgisi» kımeshek ústinen shylaýysh, kúndik oraý, «Qaıran bizdiń analar, ardy oılaǵan» óz zamanynda áje, ana, jeńgelerimizdiń kımeshek, jaýlyq, oramal taqqan sýretterinen kórme, «án, jyr, qyzyqty oıyndar (aq bata, jumbaq, jańyltpash) qamtyldy.
Maqsaty – qazaq halqynyń ulttyq salt-dástúri men ádet-ǵuryptaryn qaıta jańǵyrtý, otbasylyq qundylyqtardy dáripteý.
Ulttyq biregeılikti saqtaý jolynda dástúr men ǵurpty, zamanaýı ulttyq kıim men ana tilin júıeli jańǵyrtyp, durys tárbıe berý.
İs-sharanyń mán-mańyzy týraly «Qazaq analary dástúrge jol» respýblıkalyq qoǵamdyq birlestiginiń Almaty jáne Almaty oblysy fılıaldary tóraıymy Láıle DÁÝLET aıtyp berdi.
– 1 aqpan bul – «Halyqaralyq oramaldar kúni» bolyp bekitilgen. Biz ózimizdiń úrdisimizge saı, qazaqtyń dástúr-salty, aq kımeshek, aq oramaldyń qadiri, qyz balanyń ósý reti bári-bárin dúıim jurtqa kórsetip kelemiz. Negizi múdde – qazaqtyń ádet-ǵurpyn, salt-sanasyn óskeleń urpaqqa túsindirý. Sondaı-aq osy jıynnyń aıasynda salt-dástúr dáripteldi, án-shashý, qazaqtyń ulttyq rásimderi kórsetildi. Bundaı jıyndar ulttyq bolmysty saqtap, rýhanıatty jańǵyrtýǵa jol ashady, – dedi ol.
Sonymen qatar dástúrdi berik ustaý, qoǵam arasynda nasıhattaý, ótkendi umytpaý, bolashaqqa nyq qadam basý sıaqty keleli oı-pikirler aıtyldy.
– Biz Almaly aýdanynyń atynan osy is-sharaǵa qatysyp otyrmyz. Ózimniń 11-12 jas aralyǵyndaǵy qyzymdy qatystyrdym. Jasóspirim shaqtaǵy shash órý úlgisi, taqıa kıý, kamzol kıý sıaqty birqatar qundylyqtardy dáripteý túsý kerek. Maqsatym – kóneden, ata-babamyzdan jetken salt-dástúrdiń jańǵyrýyna zor úles qosý, – dedi kóp balaly ana Naǵıma OSPANOVA.
Qosymsha málimet: bul – «Qazaq analary – Dástúrge jol» respýblıkalyq qoǵamdyq birlestigi - QR Prezıdenti janyndaǵy «Áıelder isteri jáne otbasylyq demografıalyq saıasat jónindegi ulttyq komısıa» múshesi, Mádenıet úzdigi, Aınur Serikqyzy Júginisovanyń avtorlyq jobasy.