Ulttyq kınony qoldaý ortalyǵy elimizdiń túkpir-túkpirinde Qazaq kınosynyń on kúndigin ótedi, dep habarlaıdy aqshamnews.kz
Shara aıasynda kórermenderge QR Mádenıet jáne aqparat mınıstrliginiń, sondaı-aq Kıno ortalyǵynyń qoldaýymen túsirilgen birqatar fılmder usynylady. Alǵashqy kórsetilim Qaraǵandy oblysyn qamtymaq, sodan soń shara ózge qalalar men aýyldyq okrýgterde de uıymdastyrylady. Bastamanyń basty maqsaty – otandyq kınonyń kókjıegin keńeıtip, qazaqstandyq kınogerlerdiń jetistigimen tanystyrý.
Qazaq kınosynyń kúnderi aıasynda kórermender ózekti taqyryptardy qaýzap, el tarıhy men mádenıetin aıshyqtaıtyn fılmderdi tegin tamashalaı alady. Osylaısha, shalǵaı aýyldyń turǵyndary búgingi qazaq kınematografıasynyń úzdik týyndylarymen qaýyshpaq.
«Kórsetilimdi Qaraǵandy oblysynan bastaýymyzdyń ózindik syry bar. Bul aımaq óndiristiń qaınaǵan ortasynda ornalasqan. Bıylǵy jyldy Prezıdentimiz Qasym-Jomart Toqaev jumysshy mamandyqtar jyly dep jarıalaǵany belgili. Sol sebepti de aýqymdy sharany osy aımaqtan bastaýymyzdyń sımvolıkalyq máni bar. Qaraǵandydan bastap, elimizdiń ár buryshynda qazaq kınosynyń kúnderin ótkizý otandyq kınematografıany ilgeriletýge serpin syılaıdy dep bilemiz. Sebebi árbir fılmniń eń basty jeńisi – onyń óz kórermenin tabýy. Bizdiń maqsatymyz da ulttyq kınony halyqqa qoljetimdi etý», – dedi Basqarma Tóraǵasynyń kınojobalar monıtorıńi jónindegi orynbasary Ádilet Omarov.
Aıta keteıik, buǵan deıin Kıno ortalyǵynyń qoldaýymen 117 kartınanyń óndirisi aıaqtaldy. Onyń 72-si – kórkem, 37-si – derekti, 8-i – anımasıalyq fılmder. Prokatqa shyqqan týyndylar da artyp jatyr.
«Máselen, Kıno kúnderi aıasynda kórsetiletin «Qajymuqan» ulttyq rýhymyzdy asqaqtatsa, «Jambyl. Jańa dáýir», «Dos-Muqasan» fılmderi arqyly tulǵalarymyzdyń júrip ótken jolyna qanyǵasyzdar. «Operasıa Nabat», «Vremá patrıotov» quqyq qorǵaýshylarymyzdyń eńbegin pash etip, Otanǵa degen súıispenshilikti arttyrady. «Bokser» fılminiń basty prototıpi ózderińiz jerlesterińiz Serik Sápıev ekenin de aıta ketý kerek. «Baýyryna salý» dep atalatyn kınoda dástúrimiz dáripteledi. Kishkentaı kórermenderge arnalǵan «Taıqazan» dep atalatyn anımasıalyq fılm de nazarlaryńyzǵa usynylady. «Almaty, ıa lúblú tebá!», «Sońǵy úkim», «Dala qasqyry», «Stop, noch», «Shýlama» fılmderiniń de aıtar oıy bar. Bıyl taǵy onnan asa týyndy prokatqa shyǵady dep josparlanýda», – dedi Basqarma Tóraǵasynyń kınojobalar monıtorıńi jónindegi orynbasary Ádilet Omarov.