Qazaq ulttyq qyzdar pedagogıkalyq ýnıversıtetinde Haileybury Almaty mektebiniń dırektory Saımon Mıllspen kezdesý ótti. Kezdesýge Basqarma Tóraǵasy – Rektory Gúlmıra Qanaı, stýdentter, magıstranttar jáne doktoranttar qatysty, dep habarlaıdy aqshamnews.kz
Saımon Mılls – bilim berý salasyndaǵy joǵary bilikti maman. Shotlandıada dúnıege kelip, sol jerde bilim alǵan. Keıin Kembrıdj ýnıversıtetiniń Pembrýk kolejinde geografıa mamandyǵy boıynsha bilim alǵan. 2020 jyldyń tamyz aıynda Haileybury Almaty mektebiniń dırektory qyzmetine taǵaıyndaldy.
Kezdesý barysynda Saımon Mılls Haileybury Almaty mektebi týraly, onyń tarıhy, bilim alý múmkindikteri jáne mekteptiń qyzmeti týraly qundy aqparatpen bólisti.
«Búgin keremet kezdesý ótti. Bul bilim ordasy – kóptegen bilikti muǵalimderdi tárbıelep, búginde 12 000 stýdentke sapaly bilim berip otyrǵan irgeli oqý orny. Bul meni sózsiz shabyttandyrdy. Qazaq ulttyq qyzdar pedagogıkalyq ýnıversıtetin Qazaqstandaǵy eń bedeldi joǵary oqý oryndarynyń biri dep sanaımyn. Tipti álemniń kóptegen elderinde mundaı joǵary kórsetkish sırek kezdesedi. Men stýdentterdiń jasandy ıntellekt sıaqty jańa tehnologıalardy jetik meńgeretinine senimdimin. Sonymen qatar olardyń dástúrli bilim berý ádisterin de tereń ıgerýi mańyzdy. Ótkenniń de, bolashaqtyń da eń jaqsysyn boıǵa sińirý – eń durys tańdaý», – dedi Haileybury Almaty mektebiniń dırektory.
Saımon Mılls buǵan deıin ol Shotlandıadaǵy eń iri táýelsiz aralas kúndizgi mektepterdiń biri – Robert Gordon’s College dırektory bolyp jumys istegen. Bilim berý salasynda Saımon Mılls jastardyń áleýetin ashýǵa, sıfrlyq bilim berýdi damytýǵa, oqýshylardyń kóshbasshylyq qabiletterin qalyptastyrýǵa jáne turaqty damý daǵdylaryn úıretýge erekshe nazar aýdarady. Ulybrıtanıada jáne shetelderde mektep ınspektory retinde qyzmet atqaryp, birneshe ulttyq bilim berý komıtetteriniń múshesi boldy jáne FOBISIA-men birlesip jumys istedi.
Erkin formatta ótken kezdesýde jastar ózderin tolǵandyrǵan máselelerdi qozǵady. Qatysýshylar Haileybury Almaty mektebiniń dırektory Saımon Mıllsqa kókeıkesti suraqtaryn qoıyp, naqty jaýaptar aldy.
«Mıster Saımonspen ótken kezdesý taǵylymǵa toly boldy. Naileybury Almaty mektebi týraly tyń derekter meni erekshe qyzyqtyrdy. Bolashaqta baýyrlarymnyń osy bilim ordasynda oqýyn qalaımyn», –dedi «Shetel tili: eki shetel tili» mamandyǵynyń 4 kýrs stýdenti Jansaıa Alıbekova.
Ashyq dıalog formatynda ótken kezdesý stýdentterdiń kókeıinde júrgen suraqtarǵa jaýap alýǵa múmkindik berip, olardyń kásibı damý jolynda jańa baǵyttarǵa oı saldy. Mundaı sharalar jastardyń bilim kókjıegin keńeıtip, bolashaqqa degen senimin nyǵaıta túsetini sózsiz.
