Qazirgi ýaqytta tis aýrýlarynyń aldyn alý kabınetteri 150 mektepte ashyldy, - dep habarlaıdy Aqshamnews.kz
Jyl sońyna deıin taǵy 90 kabınet ashý josparlanyp otyr. Al 2028 jylǵa deıin mektepterde 1000 stomatologıalyq kabınetin iske qosý kózdelgen.
Bul bastama oqýshy sany myńnan asatyn iri bilim berý uıymdaryn qamtıdy. Eń aldymen, «Keleshek mektepteri» ulttyq jobasy aıasynda jańadan salynǵan mektepterde ashylýda. Ashylǵan kabınetterde oqýshylarǵa aldyn alý baǵytynda stomatologıalyq kómek kórsetiledi, aýyz qýysy aýrýlaryn erte dıagnostıkalaý júrgiziledi jáne sanıtarlyq-aǵartýshylyq jumystar uıymdastyrylady.
Oqý-aǵartý mınıstriniń aıtýynsha, oqýshylardyń densaýlyǵy men ál-aýqatyn saqtaý – bilim berý júıesiniń basty mindetteriniń biri bolyp tabylady jáne bul barlyq taraptardyń, onyń ishinde medısına mamandarynyń da qatysýyn talap etedi.
«Balalardyń qaýipsizdigi men densaýlyǵyn saqtaý memlekettik saıasattyń basty basymdyǵy. Mektep – árbir bala fızıkalyq jáne rýhanı turǵyda damıtyn qaýipsiz orta bolýy tıis. Saýyqtyrý-pedagogıkalyq tásil arqyly salaýatty ómir saltn qalyptastyrý sapaly bilim berýdiń ajyramas bóligi bolyp tabylady», – dedi Ǵanı Beısembaev.
Sonymen qatar, 1 qyrkúıekten bastap mekteptegi tamaqtanýdyń jańa standarty kúshine endi. Densaýlyq saqtaý mınıstri Aqmaral Álnazarovanyń aıtýynsha, bul standartta alǵash ret tuz ben qanttyń mólsherine shekteý belgilendi.
«Mektep medısınasyn bilim berý úderisiniń tolyqqandy bóligine aınaldyrýdamyz. Búgin biz salaýatty tamaqtaný standartyna negizdelip jańadan ázirlengen mektep as máziriniń qalaı engizilip jatqanyn kórdik. Endi balalardyń rasıonynda jańadan daıyndalǵan jáne paıdaly taǵamdar kóbeıdi. Bıyl birneshe mektepte balalarǵa tegin profılaktıkalyq kómek kórsetiletin stomatologıalyq kabınetter ashyldy», – dep atap ótti Aqmaral Álnazarova.
Oqý-aǵartý jáne Densaýlyq saqtaý mınıstrlikteriniń bastamasy ótken oqý jylynan bastaý alǵan. Sol kezde mekteptegi tamaq sapasyna baqylaý kúsheıtildi. Jańa talaptarǵa sáıkes, kún saıyn mázirdiń daıyndalý sapasyn tekserýge mektep meıirbıkeleri de tartyldy.
Aıta keteıik, Memleket basshysynyń tapsyrmasy boıynsha 1–4 synyptyń 1,8 mıllıonnan astam oqýshysy, sondaı-aq áleýmettik osal sanattaǵy 5–11 synyp oqýshylary tegin tamaqpen qamtylǵan.
Memleket basshysynyń balalardyń qaýipsizdigin nyǵaıtý, olardyń quqyqtaryn qorǵaý jáne úılesimdi damýyna jaǵdaı jasaý jónindegi tapsyrmasyna sáıkes, jańa oqý jylynan bastap elimizdiń mektepterinde stomatologıalyq kabınetter ashyla bastady. Sonymen qatar, mektepterde tamaqtanýdyń jańa standarty engizildi. Endi mekteptiń as mázirin uıymdastyrý men onyń sapasyn baqylaý mindeti densaýlyq saqtaý uıymdaryna berildi.