Óńirlik komýnıkasıalar qyzmeti men Almatynyń Bilim basqarmasynyń uıymdastyrǵan baspasóz týrynda kolej túlekteriniń eńbek naryǵyndaǵy suranysy, olardyń kásibı qalyptasýyna áser etetin negizgi faktorlar men jumyspen qamtý máseleleri qaraldy. İs-shara Memleket basshysy jarıalaǵan Jumysshy mamandyqtar jyly aıasynda uıymdastyryldy.
Almaty telekomýnıkasıa jáne mashına jasaý koleji qalanyń Bilim basqarmasynyń qoldaýymen «Kolej túlekteriniń eńbek naryǵyndaǵy suranysy» atty baspasóz týryn uıymdastyrdy. Maqsaty – básekege qabiletti jas mamandardy daıarlaýǵa áser eter faktorlardy anyqtaý.
Baspasóz týry aıasynda jýrnalıser «Almaty elektromehanıka zaýyty» JSHS-ne baryp, onda kolejdiń «Elektr jabdyqtary (túrleri boıynsha)» mamandyǵy boıynsha túlekteri jumys istep jatqanyn óz kózderimen kórdi. Jas mamandar teorıalyq bilimniń mańyzy men áleýmettik seriktestermen birlesken tájirıbelik daǵdylardy meńgerýdiń artyqshylyǵyn atap ótti.
2024–2025 oqý jylynda kolejdiń alty túlegi jınaqtalǵan transformatorlyq qosalqy stansıalardyń slesar-jınaqtaýshysy retinde zaýytqa jumysqa qabyldandy. Olardyń barlyǵy laıyqty jalaqymen, áleýmettik paketpen qamtamasyz etilgen. 2025–2026 oqý jylynda 25 stýdent dýaldi oqytý formaty boıynsha óndiristik tájirıbeden ótip jatyr. Bul – jumys berýshilerdiń jas kadrlarǵa qyzyǵýshylyǵynyń artqanyn, mamandardy tájirıbemen ushtastyryp daıarlaýdyń tıimdiligin kórsetedi.
«Bul jyl jumysshy mamandyqtar jyly dep jarıalanǵan soń, biz almatylyq kolejdermen tyǵyz ári belsendi jumys isteı bastadyq. Solardyń biri – Almaty telekomýnıkasıa jáne mashına jasaý koleji. Qazir bizde osy kolejdiń 50-den astam stýdenti jumys isteıdi. Olardyń altaýy resmı túrde jumysqa qabyldanyp, aıyna 500 myń teńgeden astam jalaqy alyp otyr. Jalpy biz stýdentterdi birinshi kýrstan bastap óndiristik tájirıbege qabyldaımyz. Dýaldi oqytý túrinde 9 aı boıy tájirıbeden ótedi. Biz bul kolejben 11 jyldan beri áriptespiz. Jyl saıyn bizge 30-40 stýdent keledi. Kópshiligi bizde turaqtap, jumysqa ornalasady», – dedi «Almaty elektromehanıka zaýytynyń» basqarma tóraǵasy Asqat Ergeshev.
Sonymen qatar, «Elektr jabdyqtary (túrleri boıynsha)» mamandyǵy boıynsha oqıtyn stýdentter «Akademıalyq utqyrlyq» jobasy aıasynda Almaty energetıka jáne elektrondyq tehnologıalar kolejinde oqý tájirıbesinen ótti. Bul tájirıbe olardyń praktıkalyq daıyndyq deńgeıin edáýir arttyryp, zerthanalyq jabdyqtar men ozyq tehnologıalardy paıdalanýǵa múmkindik berdi.
İs-shara bilim men óndiristiń tıimdi kirigýine mysal bolyp, jas mamandardy kásibı jolynda qoldaýdyń mańyzdylyǵyn taǵy bir márte kórsetti.