"Quqyqtyq tártip" respýblıkalyq jedel aldyn alý is-sharasy aıasynda Almaty qalasynyń Túrksib aýdandyq PB ákimshilik polısıa bólimshesiniń qyzmetkerleri qaladaǵy eki avtobýs parkiniń jumysyn tekserdi, - dep habarlaıdy Aqshamnews.kz.
Maqsat – jolaýshylar tasymalynyń qaýipsizdigin arttyrý jáne qoǵamdyq kólik quraldarynyń tehnıkalyq jaı-kúıin qatań baqylaý. İs-sharanyń mindetteri – qoǵamdyq kólikterdi jelige shyǵarýǵa deıin avtoparkterdiń daıyndyǵyn, reıs aldyndaǵy tekserýlerdiń, onyń ishinde medısınalyq baqylaýdyń talaptarǵa saı bolýyn qadaǵalaý, sondaı-aq jolaýshylardy tasymaldaý qyzmetiniń sapasyn baqylaý.
Polısıa qyzmetkerleri avtobýstardyń tehnıkalyq jaǵdaıyn, qajetti qujattardyń bolýyn, júrgizýshilerdiń reıs aldyndaǵy medısınalyq tekserýden ótý tártibin jáne kóliktiń qaýipsiz jumysqa daıyndyǵyn tekserdi.
Tekserý nátıjesinde zań buzýshylyqtar anyqtaldy. Avtopark laýazymdy tulǵasyna qatysty tehnıkalyq aqaýy bar kólikti jelige shyǵarǵany úshin jaýapqa tartylady. Bir qoǵamdyq kólik arnaıy aıyppul turaǵyna qoıyldy.
- Profılaktıka jyly aıasynda jolaýshylar tasymaly sapasyna baqylaý kúsheıtildi. Bizdiń maqsatymyz – tek zańbuzýshylyqty anyqtaý emes, sonymen qatar azamattar úshin bolýy múmkin qaýip-qaterdiń aldyn alý. "Quqyqtyq tártip" is-sharasy aıasyndaǵy jumystar tasymaldaýshylardyń tártibin arttyryp, qala joldaryndaǵy qaýipsizdik deńgeıin joǵarylatýǵa múmkindik beredi, – dedi Túrksib aýdandyq polısıa basqarmasynyń bastyǵy Dýman Aýhadıev.