Pasıentterdiń ómir súrý deńgeıi bes paıyzǵa artqan.
2018 jyldan bastap Qazaqstanda onkologıalyq aýrýlardan bolatyn ólim-jitim kórsetkishi 5% tómendegen. Bul týraly mamandar Almatyda ótip jatqan «Onkologıanyń ózekti máseleleri men zamanaýı mektepteri týraly» halyqaralyq ǵylymı–tájirıbelik konferensıa barysynda aıtty, dep habarlaıdy Almaty-akshamy.kz Egemen.kz silteme jasap.
Atalmysh shara barysynda QR Densaýlyq saqtaý mınıstrliginiń Medısınalyq kómekti uıymdastyrý departamentiniń bólim basshysy Gúlnar Maqsutova 2018 jyldan beri onkologıalyq aýrýlardan bolatyn ólim-jitim kórsetkishi 5 paıyzǵa tómendedi dep málimdedi.
Aldymen Qazaqstanda 2018-2022 jyldarǵa arnalǵan qaterli isikpen kúresýdiń keshendi jospary júzege asyrylyp otyrǵanyn eske sala ketý kerek.
«Keshendi jospardyń is-sharalaryn júzege asyrý barysynda qaterli isikterden bolatyn ólim-jitimdi tómendetýdiń oń úrdisteri baıqalady, 2018 jyldan bastap ólim-jitim deńgeıi 5 paıyzǵa tómendedi. 2018 jyly ólim-jitimdi kórsetkishi 100 myń halyqqa shaqqanda 78,1 qurasa, 2022 jyldyń 6 aıynda bul kórsetkish 66,8 qurady. COVID-19 jaǵdaıyna qaramastan, 0-1 satydaǵy onkologıalyq aýrýlardyń erte dıagnostıkasy artyp, 2022 jyly anyqtalǵan erte kezeńderdiń úlesi 28,7 paıyzdy qurady», - dedi Gúlnar Maqsutova.
Sondaı-aq, spıkerdiń aıtýynsha, pasıentterdiń 5 jyldyq ómir súrý deńgeıi 55 paıyzǵa deıin, ıaǵnı 2018 jylmen salystyrǵanda 5 paıyzǵa artqan.
QR Densaýlyq saqtaý mınıstrliginiń shtattan tys bas onkology, «QazORǴZI» AQ basqarma tóraıymy Dılára Qaıdarovanyń aıtýynsha, qazirgi kezde Qazaqstan Respýblıkasynyń onkologıalyq qyzmetin damytý men jetildirýdiń kelesi keshendi jospary karastyrylyp jatyr. Ol jańa onkojospar aldaǵy 5 jylǵa esepteletin bolady.
Bıylǵy 2022 jylǵy 22-23 qyrkúıek kúnderine mejelengen konferensıa ókpe obyry, sút bezi obyry, kolorektaldy obyr jáne qýyq asty bezi obyry boıynsha onkologtar mektepterin qamtyp, klınıkalyq jaǵdaılar talqylanyp, ulttyq jáne sheteldik sarapshylarmen pikir almasý júrip jatyr.
Sondaı-aq, ártúrli sıpattaǵy isikterdi dıagnostıkalaý jáne emdeý boıynsha sheberlik saǵattary, sattelıttik sımpozıýmdar, sondaı-aq farmasevtıkalyq preparattar men medısınalyq tehnıka óndirýshileriniń kórmeleri uıymdastyryldy.
İs-sharaǵa Qazaqstannan, jaqyn jáne alys shetelderden 300-den astam onkolog, sáýlelik dıagnostıka dárigerlery jáne terapevt, ıadrolyq medısına mamandary qatysyp otyr.