Qazaqstan-Reseı yntymaqtastyǵy árdaıym senimniń joǵary deńgeıimen jáne syndarly tásilderimen erekshelendi.
Qazirgi jaǵdaıda QR Memlekettik organdary elimizdiń qoldanystaǵy zańnamasyn jáne halyqaralyq sharttardy basshylyqqa alady, dep habarlaıdy Almaty-akshamy.kz QR SİM baspasóz qyzmetine silteme jasap.
Reseı Federasıasynyń bizdiń elge keletin azamattary sanynyń ósýine baılanysty keıbir qazaqstandyqtardyń alańdaýshylyǵyna oraı myna máselelerdi túsindirý qajet dep sanaımyz.
Shetel azamattarynyń QR-ǵa kirý jáne bolý tártibi bar, olardy baqylaýdy QR UQK Shekara qyzmeti jáne tıisinshe QR İİM júzege asyrady.
Qazirgi tańda barlyq memlekettik organdar shtattyq rejımde jumys isteýde jáne jaǵdaıdy turaqty baqylaýdy qamtamasyz etýde. Bul rette, kez kelgen eldiń sheteldik azamattarynyń QR aýmaǵynda merzimsiz bolýǵa quqyǵy joq, olar elimizdiń kóshi-qon zańnamasynyń talaptaryn saqtaýy qajet.
Biz quqyqtyq memlekette ómir súrip jatqanymyzdy jáne bizdiń is-áreketterimiz osy qaǵıdattardan týyndaýy tıis ekenin atap ótemiz. Sondyqtan, qoldanystaǵy sharttar saqtalýy tıis jáne yqtımal quqyq buzýshylyqtardy ákimshilik tártippen toqtatý kerek.
Memlekette ulttyq múddelerdi qorǵaýdyń tetikteri jetkilikti, bul oraıda, ulttyq múdde bárinen de joǵary.
Aınalamyzda bolyp jatqan kez kelgen kúrdeli geosaıası jaǵdaıda biz ulttyq qaýipsizdiktiń basymdyǵyna súıenetin bolamyz. Álemde oryn alǵan qubylmaly ahýal bizdiń memleketimizdiń turaqtylyǵy úshin synaq bolyp otyr.
Sonymen birge, halqymyzǵa tán adamgershilik qasıetter belgili bir moraldyq erejelerdi saqtaýdy talap etedi. Azamattarymyz ózindik danalyǵyn kórsetip, qonaqjaılylyq dástúrine berik bolady dep senemiz.
Qazaqstan – egemendi jáne táýelsiz memleket, qýatty ári uıymshyl el.
Memleket basshysy kez kelgen jaǵdaıda halyq birliginiń mańyzdy ekenin únemi aıtýda.
Qazirgi qıyn kezeńde kez kelgen ótkir málimdeme nemese áreket jaǵymsyz áser týdyrýy múmkin ekenin este ustaǵan jón.
Búgingi tańda Qazaqstannyń ınfraqurylymy kóshi-qonnyń qazirgi jaǵdaıynan salystyrmaly túrde aýyrtpalyqsyz ótýge múmkindik beredi. Qyzmet kórsetý jáne servıs obektileri de óz qýattary aıasynda jumys isteıdi.
Biz aǵymdaǵy ahýalǵa muqıat monıtorıń júrgizip otyrmyz jáne eleýli bir qaterler týyndaǵan kezde halyqaralyq quqyq pen ulttyq zańnamany eskere otyryp, tıisti sharalar qabyldanatyn bolady. Biz memlekettik organdardyń resmı jáne obektıvti aqparatyna sený mańyzdy dep sanaımyz, bul qajetsiz alańdaýshylyqtyń aldyn alýǵa kómektesedi.