75 myń adam turaqty jumys oryndaryna ornalastyryldy.
Qazaqstan Úkimeti 210 myńnan astam jastyń jumyspen qamtýdy qoldaý sharalarymen qamtylǵanyn jarıalap otyr, dep habarlaıdy Almaty-akshamy.kz.
«2022 jylǵy 1 qazandaǵy jaǵdaı boıynsha, jumyspen qamtýǵa járdemdesý sharalarymen 210 myńnan astam jas qamtyldy. Onyń ishinde 75 myń adam turaqty jumys oryndaryna ornalastyryldy», - delingen Eńbekmıni baspasóz qyzmetiniń habarlamasynda.
Jumyspen qamtýǵa járdemdesýdiń negizgi sharalarynyń ishinde mynalardy bólip kórsetýge bolady: Jastar praktıkasy; «Alǵashqy jumys orny» jáne «Urpaqtar kelisimsharty» jobalary; qoǵamdyq jumystar; «Bastaý bıznes» jobasy boıynsha kásipkerlik negizderine oqytý, onyń qorytyndysy boıynsha bıznes-ıdeıany iske asyrýǵa grant alýǵa bolady; jumys berýshilerdiń ótinimderi boıynsha qysqa merzimdi oqytý.
Bul jobalar mamandyǵy boıynsha tájirıbesi joq, jaqynda oqýyn aıaqtaǵan, sondaı-aq NEET sanatyna jatatyn 16-28 jas aralyǵyndaǵy jastarǵa arnalǵan.
Osylaısha, jastar praktıkasyn uıymdastyrý sheńberinde sońǵy úsh jyl ishinde oqýyn aıaqtaǵan joǵary oqý oryndary men kolejderdiń túlekteri qataryndaǵy jumyssyzdarǵa qoldaý kórsetiledi. 2022 jyly jumysqa ornalasqandar sany 25,3 myń adamdy qurady, onyń 44%-y turaqty jumysqa ornalastyryldy.
Tek mektep bilimi bar nemese jaqynda mamandyǵy boıynsha oqýyn bitirgen jastar úshin «Alǵashqy jumys orny» jobasy boıynsha jumysqa ornalasý múmkindigi bar. «Urpaqtar kelisimsharty» jobasy zeınetkerlik jasqa deıingi qyzmetkerlerden jas mamandarǵa tájirıbe men bilim berýdi kózdeıdi. Búgingi tańda joǵaryda atalǵan sharalarmen 3,8 myń jas qamtylǵan.
30,7 myńnan astam jas qoǵamdyq jumysqa ornalastyryldy.
Jastar arasynda kásipkerlik bastamalardy damytý maqsatynda 58 myńnan astam adam bıznes júrgizý daǵdylaryna ıe boldy, onyń 6 myńyna óz isin bastaýǵa granttar berildi.
Jumys berýshilerdiń suranysy boıynsha (oqý ornynda nemese jumys ornynda) qysqa merzimdi oqýǵa 3,3 myń adam jiberildi, olar oqý aqysy túrinde memlekettik qoldaýmen, sondaı-aq stıpendıamen jáne oqý ornyna baryp kelýge, turýǵa jáne medısınalyq tekserýden ótýge materıaldyq kómekpen qamtamasyz etildi. Onyń ishinde 1220 adam oqýdy aıaqtady, onyń 985-i jańa mamandyq boıynsha turaqty jumysqa ornalastyryldy.
5 myńnan astam jas Skills.Enbek portalynda onlaın-oqytýdan ótý arqyly quzyrettilikterin arttyryp, daǵdylardy ıgerdi.
Sonymen qatar, Eurasian Resources Group kompanıalar tobymen birlesken «Jastardy jumysqa ornalastyrý» jobasy aıasynda 529 adam jumysqa ornalastyryldy.