Tıisti sheshim shyqqan soń másele sheshiledi.
Almaty qalasynyń ákimdigi jolaýshylardy tasymaldaıtyn úsh kompanıamen sottasyp jatyr. Bul týraly qala ákimi Erbolat Dosaev aıtty, dep habarlaıdy Almaty-akshamy.kz QazAqparatqa silteme jasap.
Naýryzbaı aýdanynda ótken kezdesý kezinde qala turǵyny №14 avtobýs baǵytyndaǵy kóliktiń sany 3-4 birlikke deıin qysqarǵanyn, tańǵy ýaqytta tek 2 avtobýs júretinin aıtyp shaǵymdandy.
«Bul baǵyttaǵy avtobýs balalarymyzdy úıden mektepke deıin jáne keri qaraı jetkizetin kólik edi», - dedi ol.
Almaty qalasy mobıldilik basqarmasynyń bastyǵy Ǵanı Murzahanovtyń aıtýynsha, №14 baǵytqa qatysty biraz másele bar.
«Ol jeke tasymaldaýshy. 18 kóliktiń tek 4-5-i jolǵa shyǵady. Aldaǵy ýaqytta bul baǵyt boıynsha optımızasıa júrgiziledi. Biz avtobýstarǵa tapsyrys berdik. Olar 15 kún ishinde kelýi tıis», - dedi Ǵanı Murzahanov.
Almaty qalasynyń ákimi Erbolat Dosaev búgingi kúni úsh tasymaldaýshy kompanıamen sottasý prosesi júrip jatqanyn aıtty.
«Ókinishke oraı, tasymaldaýshylardyń barlyǵy óz mindetterin oryndaı bermeıdi. Sot tártibimen tıisti sheshim shyqqan soń, bul másele sheshiledi», - dedi qala ákimi.