Qazaqstanda bilim berý salasyn damytý maqsatynda 217 jaıly mektep pen 200 tirek mektepten turatyn jańa bilim berý jelisi qurylady. Bul týraly Premer-mınıstr Oljas Bektenov Úkimettiń keńeıtilgen otyrysynda málimdedi, dep habarlaıdy aqshamnews.kz
Jobanyń basty maqsaty – úzdik tájirıbelerdi taratý arqyly barlyq jalpy bilim berý mekemelerinde bilim sapasyn teńestirý.
Sondaı-aq, 2025 jylǵa qaraı kásiptik-tehnıkalyq bilim berý salasynda 10 tehnologıalyq kóshbasshy kolej qurylyp, olar resýrstyq ortalyqtarǵa aınalady. Budan bólek, sheteldik joǵary oqý oryndarynyń 23 fılıaly jumys istep jatqan elde bıyl taǵy 11 fılıal ashylatyny belgili boldy.
Ǵylymdaǵy jańa jetistikter:
Sátbaev ýnıversıteti Kazakhmys korporasıasynyń tapsyrysy boıynsha taza selen alý tehnologıasyn ázirledi. Bul ónim medısına, elektronıka jáne basqa da joǵary tehnologıalyq salalarda qoldanylmaq.
Nazarbaev ýnıversıtetiniń bazasynda tirek-qımyl júıesi zaqymdanǵan adamdarǵa arnalǵan ekzoskelet óndirisi damýda. Sertıfıkattaýdan keıin ekzoskeletter Densaýlyq saqtaý mınıstrliginiń tapsyrysy boıynsha shyǵarylatyn bolady.
Qazaqstandyq ǵalymdar onkologıalyq aýrýlardy emdeýge arnalǵan jańa preparat jasap shyǵardy. Preparattyń klınıkalyq synaqtary jalǵasýda, al ony jyl sońyna deıin tirkeý josparlanyp otyr.
Medısına salasyndaǵy jetistikter:
Premer-mınıstrdiń aıtýynsha, ana men bala densaýlyǵyn jaqsartý baǵytynda aıtarlyqtaı jetistikterge qol jetkizilgen:
Bala shetineý kórsetkishi 6,7%-ǵa, ana ólimi 11,4%-ǵa azaıdy.
Aýrýlardy erte dıagnostıkalaý úshin skrınıngtik tekserýler 38%-ǵa keńeıtildi, bul rette 2,8 mln adam onkologıalyq skrınıngten ótti.
Qaterli isikten bolatyn ólim-jitim kórsetkishi 3,5%-ǵa tómendedi.
Bul jobalar men jetistikter elimizdiń bilim berý, ǵylym jáne densaýlyq saqtaý salalaryn jańa deńgeıge kóterip, halyqtyń ómir sapasyn jaqsartýǵa baǵyttalǵan.