Qor Memleket basshysynyń qoldaýymen 2022 jyly qurylǵan.
Qor qurylǵan sátten bastap densaýlyq saqtaý, bilim berý, áleýmettik qoldaý jáne ońaltý salalaryndaǵy kúrmeýli máselelerge qarjylaı qoldaý kórsetý maqsatynda birqatar jobalardy júzege asyrýda, dep habarlaıdy Almaty-akshamy.kz
Atalǵan baǵytta sońǵy 2 jylda aımaqqa 3,0 mlrd teńge qarjy bólingen.
Atap aıtqanda, onkologıalyq skrınıng júrgizýge arnalǵan quny 1,1 mlrd teńgeni quraıtyn 2 jyljymaly medısınalyq keshen óz jumysyna kiristi. Jyljymaly keshen alǵash ret tabystalǵan respýblıkanyń 3 óńiriniń biri retinde Qyzylorda oblysy tańdaldy. Keshen halyqtyń densaýlyǵyndaǵy kináratty erte anyqtaýdyń múmkindigin arttyrady.
Bul óz kezeginde, shalǵaı eldi mekenderdegi turǵyndardyń joǵary mamandandyrylǵan medısınalyq kómekke qoljetimdiligin arttyrýǵa, ortasha ómir súrý jasyn uzartýǵa múmkindik beredi.
2 kólikten turatyn jyljymaly medısınalyq keshen tomosıntez fýnksıasy bar sandyq mammografıalyq jabdyqpen, sarapshylyq deńgeıdegi últradybystyq júıemen jáne joǵary dáldikpen zertteıtin kompúterlik tomografpen jabdyqtalǵan. Eki qural da Japonıada jasalǵan. Mundaı klastaǵy jáne konfıgýrasıadaǵy medısınalyq jabdyq Qazaqstanda alǵash ret qoldanysqa berilýde.
"QH Densaýlyq joly" jobasynyń iske asyrylýy onkologıalyq aýrýǵa shaldyqqandardy erte satyda anyqtaýǵa múmkindik beredi. Halyqty onkologıalyq skrınıngpen qamtý boıynsha qazirgi jospar 60%-dy quraıdy. Jobany engizý arqyly pılottyq óńirler boıynsha tekserýmen qamtýdy 70%-ǵa deıin ulǵaıtý kózdelýde.
Atap ótý kerek, jyljymaly keshen 22 qarashadan bastap, Baıqońyr qalasynda óz jumysyn bastady. Al, jeltoqsan aıynyń basynan Aral, Qazaly, Qarmaqshy, Jalaǵash, Syrdarıa, aýdandaryna shyǵyp, jyl aıaǵyna deıin 2 myńnan asa turǵyndy onkoskrınıngten ótpegen maqsatty kontıngetti jáne de saqtandyrylmaǵan azamattardy jyljymaly medısınalyq keshenniń zertteý túrlerimen qamtý josparlanýda.
Mobıldi brıgada quramy 12 mamanmen, atap aıtqanda onkolog dárigeri, últradybystyq zertteý dárigeri, sáýlelik dıagnostıka dárigeri, rentgen-laborant jáne t.b mamandarymen qamtylǵan.