Qarasaı aýdanynda Jaqsylyq Úshkempiruly atyndaǵy jańa meshit ashylatynyn budan buryn habarlaǵanbyz.
Dańqty qazaq sportshysy Jaqsylyq Úshkempiruly esimi berilgen meshittiń ashylý saltanatyna Qazaqstan musylmandary dinı basqarmasynyń tóraǵasy Naýryzbaı qajy Taǵanuly arnaıy qatysty, dep habarlaıdy Almaty-akshamy.kz QMDB baspasóz qyzmetine silteme jasap.
Bas múftı Jibek joly aýyly turǵyndaryn mereıli sátpen quttyqtap, meshit qurylysyna demeýshi bolǵan azamattarǵa alǵysyn bildirdi.
«Meıirimdilik mekeni, rýhanıat ordasy sanalatyn meshitti salý úshin qarajattan buryn jomart júrek qajet. Alla Taǵala qasıetti Qurannyń «Táýbe» súresinde: «Allanyń meshitterin shynaıy túrde Allaǵa jáne aqyret kúnine sengen, namazdy tolyq oryndaǵan, zeket bergen, Alladan ǵana qoryqqan kisiler kórkeıtedi. Mine, solardyń týra jol tabýshylardan bolýy úmit etiledi» - deıdi. Al mańdaı terimen tapqan tabysyn meshit salýǵa jumsaǵan azamattarǵa alǵystan basqa aıtarymyz joq.
Búgin saltanatty túrde ashylǵaly turǵan bul meshitke qazaqtyń bir qaısary, elin súıgen jaısańy – Jaqsylyq Úshkempiruly esimi berilip otyr. Qazaqstan musylmandary dinı basqarmasy sońǵy jyldary elimizde salynatyn meshitter men burynnan bar qulshylyq úılerine el men jerge, dinge qyzmet etken asyl azamattardyń esimin berýdi ıgi úrdiske aınaldyryp keledi. Alla Taǵalanyń qalaýymen osy meshitke Jaqsylyq Úshkempiruly esimi buıyrǵan eken, berekeli bolsyn. Kópshilik Jaqsylyq aǵamyzdy sport maıtalmany, qazaqtan shyqqan tuńǵysh Olımpıada chempıony retinde tanıtyny ras. Áıtse de, aǵamyz ómirin tek sportqa ǵana arnamady. Eldiń qamyn jep, jurtynyń jaıyn oılady. «Qazaqtyń tamyry – aýylda» degendi jan-tánimen túsingen ıgi jaqsymyz edi. Alla Taǵala meıirimine bólep, rýhy peıishte shalqysyn! Sońynda qalǵan urpaǵyna ónegeli ómir, berekeli ǵumyr tileımiz. Esimi berilgen osy meshittiń birligi jarasqan jamaǵaty kóp bolǵaı. Jaqsylyq aǵamyzdaı elin súıgen, eli súıgen erender osy óńirden shyǵa bersin. Ámın!» dedi QMDB Tóraǵasy.