Qorǵanys mınıstrliginde áıelderdi quttyqtady.
Halyqaralyq áıelder kúnine oraı Qorǵanys mınıstrliginde osy saladaǵy qyz-kelinshekterge arnalǵan saltanatty shara ótti, dep habarlaıdy Almaty-akshamy.kz.
«Otan qorǵaýshy degen qasterli mamandyq erlerge ǵana tán emes. Búginde áskerdegi qyz-kelinshekter Qarýly Kúshterdiń jaýyngerlik ázirligi men qorǵanys qabiletin nyǵaıtýǵa laıyqty úlesterin qosyp keledi. Olar ózderiniń eńbeksúıgishtigimen jáne jaýapkershiligimen erekshelenip júr», – dep atap ótti saltanatty sharany ashqan Qorǵanys mınıstriniń birinshi orynbasary Marat Qusaıynov.
Bas shtab bastyǵy áskerı qyzmetshilerdiń analary men jubaılaryna Otan qorǵaýshylardyń kúndelikti qyzmetine kórsetken qoldaýy úshin alǵysyn jetkizdi.
Sonymen birge, general-leıtenant Marat Qusaıynov Qarýly Kúshterde belsendi qoǵamdyq qyzmet atqaratyn birqatar áskerı qyzmetshilerdiń áıelderine «Otan qorǵaýshysynyń aıaýly jary» tósbelgilerin tabys etti.
Búginde qazaq áskerinde on eki myńnan astam áıel qyzmet etedi. Olardyń segiz júzge jýyǵy – ofıser. Onyń ishinde jıyrma polkovnık, bes myńǵa jýyq azamattyq qyzmetker bar. Birikken ulttar uıymynyń Batys Sahara men Lıvandaǵy mısıalaryna shtab ofıserleri men áskerı baqylaýshylary retinde tórt áıel qatysty.
Qazirgi ýaqytta názik jandylar barlyq ásker túrleri men tekterinde qyzmet etedi. Olar mergen, barlaýshy, desantshy, áskerı ushqysh sıaqty er-azamatqa tán mamandyqty meńgerip, bitimgershilik mısıalardy abyroımen atqaryp júr.
