Assambleıanyń depýtattyq mandattarynyń mańyzy arta túsedi. Bul týraly Qazaqstan halqy Assambleıasynyń kezekti otyz birinshi sesıasynda Prezıdent Qasym-Jomart Toqaev málim etti, dep habarlaıdy Almaty-akshamy.kz QazAqparatqa silteme jasap.
«Jańa jaǵdaıda Assambleıa burynǵysynsha beıbitshilik pen kelisimdegi bizdiń saıasatta berik ınstıtýsıonaldy tirek bolyp qyzmet ete beredi dep senemin. Búgingi sesıanyń maqsaty – saıası júıeniń reformasynda Assambleıanyń orny men rólin aıqyndaý, onyń ary qaraı damýynyń vektoryn belgileý», - dedi Prezıdent.
Osy oraıda Memleket basshysy jańa kezeńde Assambleıasy úsh negizgi basymdyqqa ekpin qoıýy tıis ekenin aıtty.
«Birinshiden, saıası reformalardy júzege asyrýda Assambleıanyń rólin kúsheıtý. Ózderińiz bilesizder, bıliktiń zańnamalyq tarmaǵyn reforamasy aıasynda Assambleıanyń atynan depýtattar qazirgideı Májiliste emes, Senatta bolady. Májiliste Assambleıanyń kvotasyn qysqartý demokratıalyq saılaý standarttaryn saqtaýǵa qatysty birqatar máseleni sheshedi. Sonymen birge, Assambleıa atynan kelgen senatorlar jalpyulttyq ıntegrasıa men etnomádenı áralýandyq negizinde Qazaqstannyń barsha etnıkalyq toptary múddeleriniń barsha jıyntyǵyn kórsetedi. Mundaı model halyqaralyq tájirıbe men Qazaqstannyń parlamenttik júıesiniń ereksheligin tıisti túrde tanytady», - dedi Qasym-Jomart Toqaev.
Prezıdenttiń aıtýynsha, jańa fýnsıa men Senattyń rólin eskere otyryp, Assambleıanyń depýtattyq mandattarynyń mańyzy arta túsedi. Sonymen qatar, Assambleıa Senat depýtattyǵyna kandıdattardy irikteýdiń tıimdi ári ashyq rásimin ázirleýi kerek.
«Osy máselelerdiń barlyǵy «Qazaqstan halqy Assambleıasy» týraly jańartylǵan zańda kórinis tabýy tıis», - dedi Memleket basshysy.