QR Prezıdenti Qasym-Jomart Toqaev eldi jańǵyrtý isine Assambleıanyń ǵylymı-sarapshylyq áleýetin tolyǵymen jumyldyrý qajettigin aıtty, dep habarlaıdy Almaty-akshamy.kz.
«Halyqtyń birligin nyǵaıtýmen keshendi túrde aınalysyp, elimizdegi ahýaldy turaqsyzdandyrý talpynystaryn der kezinde beıtaraptandyrý qajet. Bul saladaǵy qatelikter óte qymbatqa túsetinin, buǵan deıingi jetistikterimizdiń bárin joqqa teńeýi múmkin ekenin túsiný mańyzdy», - dedi Prezıdent Qazaqstan halqy Assambleıasynyń HHHİ sesıasynda.
Memleket basshysy Assambleıanyń ǵylymı-sarapshylyq áleýetine de toqtaldy.
«Elimizdi jańǵyrtý isine Assambleıanyń ǵylymı-sarapshylyq áleýetin tolyǵymen jumyldyrǵan jón. Etnosaralyq saladaǵy búkil problemalyq máseleler men ózekti tendensıalar jarıa túrde tereń zerttelip, talqylanýy kerek. Biz birligimizge neniń qaýip tóndirip turǵanyn aıqyn túsinip, ashyq aıtýǵa mindettimiz. Onyń ózinde etnosaralyq salaǵa tek assambleıanyń qyzmeti ǵana kirmeıtinin, áleýmettik blokqa jatatyn mınıstrlikterdiń, ákimdikterdiń, jalpy Úkimettiń qyzmeti de kiretinin aıqyn aıtýymyz kerek», - dedi Qasym-Jomart Toqaev.