Búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótti. Onda elimizdiń 2024 jylǵy áleýmettik-ekonomıkalyq damýyna qorytyndy jasalynyp, bıyl atqarylýy tıis mindetter júkteldi.
Jalpy mundaı formattaǵy jıyn eldegi jaǵdaıdy baqylaýda ustaý jáne qysqa ýaqytta atqarylýy tıis sharýalardy pysyqtaýǵa múmkindik beredi. Sondyqtan saıası turǵydan bizge unasyn, unamasyn osyndaı jıyndar ótýi qajet.
Úkimet otyrysynyń mazmunyna keler bolsaq, onda Premer-mınıstr Oljas Bektenov, Premer-Mınıstrdiń orynbasary Serik Jumanǵarın, Ulttyq bank tóraǵasy Tımýr Súleımenov, «Samuryq-Qazyna» AQ basqarma tóraǵasy Nurlan Jaqypov, Astana qalasynyń ákimi Jeńis Qasymbek, Shymkent qalasynyń ákimi Ǵabıt Syzdyqbekov, Qyzylorda oblysynyń ákimi Nurlybek Nálibaev baıandama jasady. Kabmın basshysy ótken jylǵa qorytyndy jasap, bıyl atqarylatyn sharýalar týraly baıandady. Onyń orynbasary Serik Jumanǵarın qarjy-ekonomıkalyq salany damytý boıynsha Úkimettiń usynystaryn aıtty.
Baıandamashylardyń sózinen keıin prezıdent Úkimet pen ózge de memleketik organdarǵa birneshe tapsyrma berdi. Basym kópshiligi byltyrǵy joldaýdaǵy tapsyrmalardy oryndaý boıynsha taktıkalyq máselelerdi qamtyǵan. Prezıdent ásirese ekonomıkany ártaraptandyrýda ınvestısıalyq klımatqa basa nazar aýdarǵan. Osy baǵytta óńdeý ónerkásibi, týrızm jáne ózge de salalarǵa basymdyq berýdi tapsyrdy. Barlyq mindetter bıyl jyldyń sońyna deıin oryndalýy tıis. Sondyqtan memleket basshysy Úkimet múshelerinen sheshim qabyldaýda batyldyq tanytýdy talap etti.
.