TMD-nyń 2030 jylǵa deıingi ekonomıkalyq damý strategıasynyń mindetterin iske asyrýǵa erekshe nazar aýdaryldy.
Prezıdent TMD-ǵa múshe memleketter basshylarynyń beıresmı kezdesýine qatysty, dep habarlaıdy Almaty-akshamy.kz Aqordanyń resmı saıtyna silteme jasap.
Dostastyq uıymyna múshe memleketter basshylarynyń beıresmı kezdesýine Qazaqstan Prezıdenti Qasym-Jomart Toqaevpen qatar Ázirbaıjan Prezıdenti Ilham Álıev, Armenıa Premer-Mınıstri Nıkol Pashınán, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, Reseı Prezıdenti Vladımır Pýtın, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov, Ózbekstan Prezıdenti Shavkat Mırzıóev qatysty.
Memleket basshysy Sankt-Peterbýrgte ótetin memleketter basshylarynyń kezdesýi TMD aıasyndaǵy yntymaqtastyqtyń ózekti máseleleri jóninde pikir almasýǵa jáne keleshekte atqarylatyn mindetterdi aıqyndaýǵa jaqsy múmkindik beretinin jetkizdi.
Qasym-Jomart Toqaev Qazaqstan TMD-ǵa tóraǵalyǵy aıasynda Dostastyqtyń áleýetin kúsheıtý úshin birqatar naqty shara qabyldaǵanyn atap ótti.
– Jyl boıy 80-nen astam iri shara ótkizildi. Ekonomıkalyq yntymaqtastyqty keńeıtýge, tyǵyz gýmanıtarlyq baılanystardy saqtaýǵa jáne Uıymnyń bedelin arttyrýǵa baǵyttalǵan kóptegen bastama júzege asyryldy. Bizdiń birlesken kúsh-jigerimiz qazan aıyndaǵy Astana samıtiniń qorytyndysy boıynsha qabyldanǵan qujattarda aıqyn kórindi. Jyl boıy, eń aldymen, TMD-nyń 2030 jylǵa deıingi ekonomıkalyq damý strategıasynyń mindetterin iske asyrýǵa erekshe nazar aýdaryldy. Bul baǵyttaǵy jumystar tabysty boldy. Qazaqstannyń TMD-ǵa múshe memlekettermen aradaǵy taýar aınalymy qańtar-qazan aılarynda 11 paıyzǵa artyp, shamamen 30 mıllıard dollarǵa jetti. Byltyr osy kezeńde 26,5 mıllıard dollar boldy. Ósim shamamen 5 mıllıard dollardy qurady. Bul – jaqsy úrdis, – dedi Memleket basshysy.
Prezıdent ishki óńirlik saýda-sattyqtyń qarqynyn saqtap, ekonomıkalyq saıasatty qazirgi jaǵdaılarǵa beıimdeý mańyzdy ekenin aıtty. Sondaı-aq TMD-ǵa múshe memleketter basshylarynyń nazaryn mynadaı ózekti mindetterdi sheshýge aýdardy.
– Saýda-sattyqqa qolaıly jaǵdaı jasaýǵa basa mán berý kerek. Ol úshin tarıftik jáne tarıftik emes kedergilerdi joıý, proteksıonızmge jol bermeý jumystaryn jan-jaqty júrgizgen jón dep esepteımiz. Azyq-túlik qaýipsizdigi máselelerine qatysty is-áreketterdi jolǵa qoıý qajet. Kelesi jyly Astanada ótetin TMD-ǵa múshe memleketter mınıstrleriniń konferensıasy osy salada ortaq tásilder qarastyrýǵa arnalady. Osy saladaǵy mınıstrler belsendi qatysady dep senemiz. TMD keńistiginde kólik-logıstıkalyq jobalardyń tıimdiligin arttyrý úshin yntymaqtastyqtyń jańa mehanızmderi men formaty kerek. Osy tusta «Soltústik – Ońtústik» halyqaralyq dáliziniń mańyzy artyp otyr, sondaı-aq «Qazaqstan – Túrikmenstan – Iran» temir joly mańyzdy kólik baǵyty retinde zor ról atqarady, – dedi Prezıdent.
Memleket basshysy qaýipsizdik salasyndaǵy is-áreketterdi kelesi mańyzdy baǵyt retinde atap ótti. Qazaqstan tóraǵalyǵy aıasynda qabyldanǵan 2023-2025 jyldarǵa arnalǵan terorızm men ekstremızmge qarsy kúrestegi yntymaqtastyq baǵdarlamasy bul mindetterdi atqarýǵa tolyq saı keledi.
– Uıymdy qazirgi jahandyq jaǵdaılarǵa beıimdeý úshin onyń áleýetin únemi jetildirip, Dostastyqtyń halyqaralyq arenadaǵy bedelin kúsheıtýge týra keledi. Jaqyn arada TMD janyndaǵy Baqylaýshy jáne Dostastyqtyń seriktesi ınstıtýttaryn qurýǵa qatysty qujattardy ázirleý jumystary bastalady. TMD keńistiginde ortaq mádenı-gýmanıtarlyq yntymaqtastyq jáne tilderdiń qoldanys aıasyn keńeıtý isiniń máni zor. Sankt-Peterbýrgke Dostastyqtyń 2023 jylǵy Mádenı astanasy resmı mártebesin berý TMD-ǵa múshe memleketter arasyndaǵy mádenı baılanystardy nyǵaıtýǵa yqpal etedi, – dedi Qasym-Jomart Toqaev.
Memleket basshysy Qasym-Jomart Toqaev jıynǵa shaqyrǵany jáne qonaqjaılyq kórsetkeni úshin Vladımır Pýtınge rızashylyǵyn bildirdi. Sondaı-aq Sadyr Japarovqa Qyrǵyz Respýblıkasynyń TMD-ǵa aldaǵy tóraǵalyǵyna tabys tiledi.