«Vırýs tezirek joıylsa» degen ortaq arman oryndalar emes.
Pandemıa qashan aıaqtalady? Bul - álem halqyn alańdatyp otyrǵan basty máseleniń biri. Osy kúnge deıin túıtkildi saýaldyń túıinin sheshpek bolǵandar kóp. Tipti, optımısik málimdemeler jasap, 2023 jylǵa úlken úmitpen qaraǵandar da jetkilikti boldy. Biraq qazir Qytaıdaǵy ahýalǵa qarap, indetten arylatyn ýaqyt áli alys ekenin ańǵarýǵa bolady, dep habarlaıdy Almaty-akshamy.kz «Habar 24» telearnasyna silteme jasap.
«Bıyl qandaı úmit aqtalmady?» degen suraqqa jaýap izdegen jan pandemıa taqyrybyna tireleri sózsiz. Sebebi 2022 jyly memleket basshylary jahan jurtyna COVID-19-dyń tarıhqa aınalatynyn jarıa etken edi. Qańtarda Danıa Premeri koronavırýstyń endi qoǵamǵa esh qaýpi joq dese, qyrkúıekte Aq úı basshysy indettiń aıaqtalǵanyn málimdedi. Alaıda áli kúnge deıin álem jurty pandemıamen ómir súrip keledi. Úsh jyldaı ýaqyt ótse de, buqaranyń «Vırýs tezirek joıylsa» degen ortaq armany oryndalar emes. Ony qazir Qytaıdaǵy ahýaldan anyq kórýge bolady. Shekteý sharalaryn sońǵy elderdiń biri bolyp alyp tastaǵan bul memlekette búginde koronavırýs órship tur. Aýrýhanalar naýqasqa lyq toly. Dárigerler koronavırýs juqtyrǵandardy qabyldap úlgermeı jatyr.
«Sońǵy kúnderi júkteme tym artyp ketti. Kún saıyn aýrýhanaǵa 530 adam aýyr halde túsedi. Olardyń qanynda ottegi mólsheri óte tómen. 50-70% tóńireginde ǵana», - deıdi medbıke Chjoý In.
Mundaı qarqynmen aldaǵy 1-2 aıda Qytaıda koronavırýstan 1 mln adam kóz jumýy múmkin. Sondyqtan azamattardy jappaı vaksınalaý kerek. Ásirese, qart kisilerdi. Óıtkeni ekpe egý naýqanyn qolǵa almasa, jańajyldyq abyr-sabyr kezinde naýqastar sany odan saıyn artady degen qaýip bar.
«Koronavırýs juqtyryp, aýrýhanaǵa túsip jatqandar qatary artyp jatyr. Qańtar men aqpan aılarynda ahýal budan da qatty nasharlaı túsýi múmkin. Sondyqtan qys mezgili densaýlyq saqtaý salasy úshin aıtarlyqtaı qıyn bolady. Oǵan tek koronavırýs qana emes, osy mezgilde asqyna túsetin tumaý da áser etedi», - deıdi Saýtgempton ýnıversıtetiniń ǵalymy Maıkl Hed.
Sarapshynyń sózinshe, naýqastardyń artýy tek Qytaıda ǵana emes, álemniń kóptegen elinde baıqalady.
"Soltústik Amerıkada da Qytaı uqsas jaǵdaı. Vırýs juqtyrý derekteri artyp jatyr. Budan bólek, Afrıka memleketteriniń jaǵdaıyna kóńil aýdarýymyz kerek. Óıtkeni bul elderde áli kúnge vaksınanyń bir dozasyn da almaǵandar kóp. Naqty qansha adamnyń ımýnıteti ınfeksıaǵa tótep bere alatynyna da belgisiz. Sondyqtan osy aımaqta epıdbaqylaýdy kúsheıtýimiz kerek», - deıdi Saýtgempton ýnıversıtetiniń ǵalymy Maıkl Hed.
Taǵy bir másele, vırýstyń mýtasıalanǵan túrlerimen baılanysty. Jańa jylda onyń jańa túri paıda bolýy múmkin. Sondyqtan býsterlik dozaǵa mán bergen abzal.