Últramarafonshynyń endigi baǵyty – Osakarovka
2 mamyr kúni Qaraǵandy oblysynyń Aqjal kentinen júgirýdi bastaǵan Ortalyq sport klýbynyń áskerı qyzmetshisi efreıtor Baýyrjan Ábdiqaıym búgin Shahterler astanasyna kelip jetti, dep habarlaıdy Almaty-akshamy.kz.
«Astana» óńirlik qolbasshylyǵynyń úzdik sportshylary marafonshyny oblys ortalyǵymen alyp ótip, kelesi núktege deıin shyǵaryp saldy. Baýyrjan Ábdiqaıymmen birge olar 20 shaqyrym júgirip, jeńil atletke qoldaý kórsetti.
Táýelsizdik stelasynan bastap, Serik Sápıev atyndaǵy Boks ortalyǵyna deıin, sondaı-aq Qaraǵandy memlekettik medısına ýnıversıtetinde qala boıynsha júgiretin sportshylar úshin «ashyq dálizder» uıymdastyryldy. Stýdentter, áskerı qyzmetshiler men qala turǵyndary Baýyrjan Ábdiqaıymǵa qoshemet kórsetti.
Últramarafonshynyń endigi baǵyty – Osakarovka. Baýyrjan Ábdiqaıymmen birge dárigerler, massajıster, jattyqtyrýshylar, áskerı polıseıler jáne Qazaqstan rekordtar kitabynyń ókilderi erip júr.
Ár elý shaqyrym saıyn ol tamaqtaný úshin on mınýtqa aıaldaıdy.
Otan qorǵaýshylar kúni men Jeńis kúnine arnalǵan is-sharany uıymdastyrýshylardyń aıtýynsha, Baýyrjan Ábdiqaıym óz babynda, kóńil-kúıi de jaqsy. Ol marafondy 6 mamyr kúni Astanada aıaqtaýǵa nıetti.
Elimizdiń Qarýly kúshterinde óz rekordtaryn ataýly kúnder men memlekettik merekelerge arnaý dástúri qalyptasqanyn atap ótken jón.